दैनिक १० देखी २० जना बालबालिकाहरु अझै उपचारमा आउने क्रम जारी । वेड र औषधिको अभावमा उपचार गर्न समस्या ।
सिन्धुली /दुई सातादेखि सिन्धुलीका बालबालिकाहरुमा देखा परेको मौसमी भाइरलको संक्रमण अझै नियन्त्रणमा आउन सकेको छैन । सिन्धुलीको सदरमुकाम माढी, कमलाखोंच र मरिण क्षेत्रमा देखा परेको भाइरल नियन्त्रणमा आउन नसकेको हो । गत भदौं १ गतेदेखी एकाएक फैलिएको भाइरलका कारण आइतबारसम्म जिल्ला अस्पताल सिन्धुलीमा सात सय बढी बालबालिकाहरु संक्रमित भएर उपचारका लागि आएको सिन्धुली अस्पतालकी मेडिकल सुपरिटेण्डेन्ट डा. सुमित्रा गौतमले बताइन् ।
पछिल्ला केहि दिनमा भने पहिलेको तुलनामा बालबालिकाहरुलाई उपचारमा ल्याउने क्रममा केहि कमी आएको पनि उनले जानकारी दिएकी छिन । उनक अनुसार भाइरल संक्रमण भने नियन्त्रणमा आइसकेको छैन ।
‘दिनमा ४० देखी ६० जनासम्म भाइरलबाट ग्रसित बालबालिकाहरु अस्पतालमा उपचारका लागि आउने गरेकोमा हिजो आज दैनिक १० देखी ३० जनासम्म आउने गरेकाले संक्रमणमा केहि कमी आएको अनुमान गर्न सकिने पनि उनले बताईन ।
अस्पतालमा भाइरलबाट ग्रसित बालबालिकाहरुको संख्या बढ्दै जाँदा उपचारमा समेत समस्या आएको अस्पतालले जनाएको छ । अस्पतालमा भएका २५ बेडमा भाइरलपछि प्रायः बालबालिकाहरुलाई मात्र भर्ना गराएर उपचार गर्ने गरिएको छ ।
दैनिक रुपमा उपचारमा ल्याइने भाइरलको गम्भीर संक्रमण भएका बालबालिकाहरु र भर्ना भएर उपचार गराई राखिएको बालबालिकाहरुलाई पालै पालो बेड भर्ना गरेर उपचार गराउँदा ठुला विमारीलाई भर्ना लिनै नसकिएको डा. गौतमले बताईन ।
भाइरलको संक्रमणलाई हेर्दा कम्तीमा पनि बालबालिकाहरुलाई दुई हप्तासम्म चिकित्सकको निगरानीमा राखेर उपचार गर्नु पर्ने भएको उनले बताईन । यस्ता बालबालिकाहरुमा रुघाखोकी लाग्ने, ज्वरो आउने, छातीमा इन्फेक्सन तथा घाँटीमा समस्या देखिने गरेको छ । जिल्लामा खास गरेर ६ महिनादेखी ५ वर्ष मुनिका बालबालिकाहरुमा यस्तो समस्या बढी पाइएको अस्पतालले जनाएको छ ।
एउटै बेडमा धेरै बालबालिकाहरुलाई राखेर उपचार गराउनु परेको बताउँदै उनले रोगको संक्रमण झन बढ्न सक्ने चुनौती समेत थपिएको बताईन । एकै पटक धेरै बालबालिकाहरु विमारी हुँदा उनिहरुलाई उपचारमा औषधीको समेत अभाव भएको गौतमले बताइन । सरकारले निःशुल्क दिने भनेको औषधी समेत गत आर्थिक वर्षबाट जिल्लामा अभाव छ । अस्पतालमा नियमित आउने औषधी खरिदको रकम समेत स्थानीय तह वा प्रदेश सरकार मातहतमा हुने भन्ने अन्यौंलताका कारण गत वर्ष निःशुल्क औषधी खरिद गर्न नसकिएको पनि उनले बताईन । डा. गौतमका अनुसार बालबालिकाहरुलाई भाइरलबाट जोगाउँन खोक्दा, हाच्छिउ गर्दा सफा कपडा वा रुमालले नाक, मुख छोप्ने र छोपाउने गर्न सुझाव छ ।
