सिन्धुली /कृष्ण जन्माष्टमीको अवसरमा आइतबार सिन्धुलीमाढीमा लाखे नाच नाचिएको छ । नेवाः गुठी समाज सिन्धुलीको आयोजनामा सिन्धुलीमाढीमा लाखेनाच तथा नेवारी झाँकी र नेवारी गीत संगित प्रस्तुत गरिएको हो । २०४५ सालसम्म एक साता लामो लाखेनाच देखाउदै आएका सिन्धुलीका नेवार समुदायहरुले २०४५ सालपछि लामो लाखेनाच नाच्न भने छोडेका छन ।
गाइजात्राको दिनदेखी सुरु भई श्रीकृष्ण जन्मास्टमीको दिन समापन गरिने लाखेनाच नयाँ पुस्ताको वेवास्ताका कारण हुन छोडेको हो । लाखे नाच्न र नेवारी संस्कृतीका बारेमा चासो दिन छाड्दै जाँदा र पुराना पुस्ताको निधनपछि सिन्धुलीमा निरन्तर हुन नसकेको नेवाः गुठी समाज सिन्धुलीका अध्यक्ष लक्ष्मिदास श्रेष्ठले बताए ।
तर, पछिल्लो समय नयाँ पुस्ताहरुले नै लाखे नाच र नेवारी संस्कृतीका बारेमा चासो दिन थालेपछि पुनः लाखेनाच सुरु भएको छ । पहिले पहिले एक सातासम्म देखाईने लाखे नाच पछिल्ला केहि वर्षयता एक दिनमात्र देखाउन थालिएको छ । लाखेनाच र नेवारी संस्कृतीका बारेमा जानकार व्यक्तिहरुको अभाव भएपछि एक दिन मात्र देखाएर समापन गरिएको गुढी समाजका विनेश श्रेष्ठले बताए । उनका अनुसार अर्को वर्षबाट लाखेनाचलाई व्यवस्थित गर्दै देखाइने छ ।
जिल्लामा काभ्रे, भक्तपुर र रामेछापबाट आएका नेवार समुदायहरुले यस अघि लाखेनाच लगाएतका सांस्कृतीक पर्वहरु आफ्नो थाकथलोमै पुगेर मनाउँदै आएका थिए । पहिला जिल्लामा आएका पुराना पुस्ताहरु हुँदा परम्परागत रुपमा धुमधामका साथ सात दिनसम्म नै लाखे नाच नाच्ने गरिएको जानकारहरु बताउँछन् ।
