सिन्धुली /अर्थमन्त्री डाक्टर युवराज खतिवडाले आइतबार प्रस्तावित चियाबारी–खुर्कोट सुरुङमार्गको निर्माण स्थलको स्थलगत निरिक्षण गरेका छन् । अर्थमन्त्री खतिवडाले खुर्कोट र चियाबारीमा स्थलगत निरिक्षण गरेका हुन् । कमलामाई नगरपालिकाका मेयर खड्ग खत्री सहितको जनप्रतिनिधिको टोली र मन्त्री खतिवडाले संयुक्त रुपमा सुरुङमार्ग निर्माण गर्ने स्थलको निरिक्षण गरेको कमलामाई नगरपालिका सिन्धुलीका मेयर खड्ग खत्रीले बताए ।
जापान सरकारले निर्माण गरेको विपी राजमार्गको सिन्धुली खुर्कोट खण्डमा ठुला सवारी साधन सञ्चालनमा समस्या आएपछि सरकारले बैकल्पिक मार्गका रुपमा चियाबारीदेखी खुर्कोटसम्म सुरुङमार्ग निर्माण गर्ने निर्णय गरेको थियो ।
अर्थमन्त्री खतिवडाले सुरुङमार्ग निर्माणका लागि सम्भाव्यता अध्ययन, भौगोलिक अवस्था, आवश्यक बजेटका बारेमा जिल्लाबासीसंग छलफल समेत गरेका छन । निरिक्षणका क्रममा अर्थमन्त्री खतिवडाले सुरुङमार्गको निर्माणका लागि विदेशी दातृ निकायहरुसंग कुरा भइरहेको र नेपाल सरकार र दातृ निकायको सहयोगमा छिट्टै निर्माण कार्य थालिने जानकारी दिएको समेत खत्रीले बताए ।
उनले भने, ‘मन्त्री ज्युले सुरुङमार्गलाई निक्कै चासोको साथ लिनु भएको छ । मार्गको डिपीआर यसै वर्ष तयार गरि सकिने र आगामी आर्थिक वर्षबाट निर्माणको काम थाल्ने गरी सरकार लागि परेको छ ।’ झण्डै ५ किलोमिटर लामो सुरुङ मार्ग निर्माणका लागि सरकारले चालु आर्थिक वर्षमा ५ करोड रुपैयाँ बजेट विनियोजन समेत गरेको छ ।
उक्त बजेटले यसै वर्ष सुरुङमार्गको सम्भाव्यता अध्ययन थालिने जनाइएको छ । वीपी राजमार्गको सिन्धुलीबाट खुर्कोटसम्मको झण्डै २५ किलोमिटर सडक साँघुरो र घुम्ती नै घुम्ती हुँदा सडकमा ठुला सवारी साधन सञ्चालनमा समस्या आइरहेको छ । १० टन भन्दा बढी भारबहन क्षमताका सवारी साधन र २९ सिटभन्दा लामा बसहरु सञ्चालन गर्दा सडकमा क्षती पुग्नुका साथै सडक दुर्घटना बढ्ने भन्दै त्यसको विकल्पमा सुरुङमार्ग निर्माण गर्न स्थानीय जनप्रतिनीधिहरुले सरकारलाई दवाव दिँदै आएका थिए ।
सुरुङमार्ग निर्माणपछि ठुला सवारी साधन त्यहिँबाट सञ्चालन गर्ने र विपी राजमार्गको नागबेली सडकमा पर्यटकीय सवारी साधनलाई मात्र आवतजावत गर्न दिईने योजनामा छ । जापान सरकारको झण्डै २५ अर्व रुपैयाँ लागतमा चार वर्ष अघिमात्र निर्माण सम्पन्न गरिएको राजमार्ग २०७२ सालको भुकम्पले क्षती पु¥याएको थियो ।
मध्य तराईबाट राजधानी भित्रन सबै भन्दा छोटो मार्गका रुपमा लिइएको वीपी राजमार्गमा यसरी सुरुङमार्ग निर्माण सम्पन्न भएपछि राजधानी झनै नजिक हुने निश्चित छ । मन्त्री खतिवडाले कमलामाई नगरपालिकाको ९ र १० नम्बर वडा जोड्ने गरी कमलानदीमा पक्कीपुल निर्माणका लागि समेत स्थलगत निरक्षण गरेका छन् । खतिवडाले नगरप्रमुख खत्रिको आग्रहमा पुल निर्माणका लागि आवश्यक पहल गर्न पुल निर्माण गर्ने स्थानको निरिक्षण गरेका हुन् ।
