सिन्धुली । सदरमुकाम सिन्धुलीमाढीमा संचालनमा रहेका हार्डवेयर पसलहरुले एउटै कम्पनीका निर्माण सामग्रीहरु फरक–फरक मुल्यमा खरिद विक्री गर्ने गरेको फेला परेको छ । भुकम्पपछिको पुनःनिर्माण र पुनस्र्थापनामा सदाचार कार्यक्रम अन्तर्गत बुधवार जिल्ला प्रशासन कार्यालय सिन्धुलीको अगुवाई तथा ट्रान्सपरेन्सी इन्टरनेशनल नेपाल जिल्ला सम्पर्क कार्यालय सिन्धुलीको संयोजनमा गरिएको बजार अनुगमनका क्रममा यस्तो देखिएको हो ।
सदरमुकाम भित्र संचालनमा रहेका ९ वटा हार्डवयर पसलहरुमा अनुगमन गर्दा एउटै कम्पनीका रड, सिमेन्ट, इंटा, जस्ता लगाएतका निर्माण सामग्रीहरुको पसलै पिच्छे फरक फरक मुल्यमा खरिद विक्री हुने गरेको पाईएको ट्रान्सपरेन्सी इन्टरनेशनल नेपाल जिल्ला सम्पर्क कार्यालय सिन्धुलीका जिल्ला अधिकृत गंगा घिमिरेले जानकारी दिइन ।
अनुगमन गरिएका शिव आईरन, श्याम आरन, श्रेष्ठ हार्डवयर सप्लार्यस, सातधारा सप्लायर्स, शिद्धबाबा टेर्डस, मनकामना हार्डवयर एण्ड सप्लायर्स, निलकमल ईन्टरप्राईजेज् लगाएतका पसलहरुमा एउटै कम्पनीका निर्माण सामग्रीहरुको फरक– फरक मुल्य पाइएको छ ।
अनुगमन गरिएका ९ वटै पसलहरुमा मुल्य सूचि पनि नराखेको पाइएको घिमिरेले बताइन । बुधवार नै भुकम्पपछि निर्माण गरिएका सरकारी कार्यालयहरुको पनि अुनगमन गरिएको छ । निर्माणाधिन एकिकृत सरकारी भवन, जिल्ला बन कार्यालयको भवन, सिंचाई डिभिजन कार्यालय भवनको पनि अनुगमन गरिएको थियो । अनुगमनका क्रममा निर्माणाधिन एकिकृत सरकारी भवन तोकिएको समयमा निर्माण सम्पन्न नहुने देखिएको घिमिरेले जानकारी दिईन ।
अनुगमनमा ट्रान्स्परेन्सी इन्टरनेशनलका जिल्ला अधिकृत गंगा घिमिरे, कमलामाई नगरपालिका वडा नं. ६ का वडा अध्यक्ष उज्जल थापा, जिल्ला प्रशासन कार्यालय सिन्धुलीका प्रतिनिधि, सिन्धुली उद्योग बाणिज्य संघका प्रतिनिधि, नेपाल पत्रकार महासंघ सिन्धुलीका प्रतिनिधि, इन्सेक जिल्ला प्रतिनिधि लगाएतको सहभागिता रहेको थियो ।
