सिन्धुली । जिल्लामा लागु औषध प्रयोग गरेर सवारी साधन चलाउन नपाईने भएको छ । लागु पदार्थ सेवन गरेर सवारी चलाउनेहरु अब फन्दामा पर्ने भएका छन ।
जिल्ला प्रहरी कार्यालय सिन्धुली र जिल्ला ट्राफिक प्रहरी कार्यालय सिन्धुलीले जिल्ला जनस्वास्थ्य कार्यालयसँग सहकार्य गरेर अब मुख्य राजमार्ग तथा भित्री सडकमा समेत लागु औषध सेवनको चेकजाँच सुरु गरेको छ ।
शुक्रबारदेखि जिल्ला जनस्वास्थ्य कार्यालय सिन्धुलीको प्राविधिक सहयोगमा उक्त जाँच सुरु भएको हो । विपी राजमार्ग र मदनभण्डारी राजमार्गको संगम स्थल कनपा ९ भिमानमा शुक्रबार गरिएको जाँचमा २ जना चालक र एक जना सहचालकले लागु औषध सेवन गरेको पाईएको छ । उनीहरुलाई लागु औषध नियन्त्रण ऐन अन्तर्गत कारवाहिका लागि प्रक्रिया अगाडि बढाईएको जिल्ला प्रहरी कार्यालय सिन्धुलीले जनाएको छ ।
जिल्ला प्रहरी कार्यालय सिन्धुलीका प्रमुख एसपी गोविन्दराज काफ्लेका अनुसार जिल्लामा लागु औषध ओसार पसार र प्रयोग नियन्त्रण गर्न र सवारी दुर्घटना न्युनिकरण गर्नका लागि उक्त जाँच सुरु गरिएको हो । जिल्लाका विपी राजमार्ग, मदनभण्डारी राजमार्ग र मध्यपहाडी राजमार्गमा लागु औषध सेवनको जाँच गरिने पनि उनले बताए ।
जिल्लामा पहिलो पटक गरिएको लागु औषध सेवनको जाँचको उद्घाटन प्रमुख जिल्ला अधिकारी भरत खनाल, कमलामाई नगरपालिकाका उपप्रमुख मञ्जु देवकोटा, जिल्ला प्रहरी कार्यालय सिन्धुलीका प्रमुख एसपी गोविन्दराज काफ्ले, जिल्ला ट्राफिक प्रहरी कार्यालय सिन्धुलीका प्रमुख मञ्जु कुमारी राना लगाएतको उपस्थितिमा गरिएको थियो ।
कार्यक्रममा बोल्दै कमलामाई नगरपालिकाका उपमेयर मञ्जु देवकोटाले सवारी दुर्घटना न्युनिकरणका लागि लागु पदार्थ सेवन जाँच प्रभावकारी हुने भन्दै स्थानीय तहले सक्दो सहयोग गर्ने बताईन । कार्यक्रममा बोल्दै प्रमुख जिल्ला अधिकारी भरत खनालले यो अभियानले सवारी दुर्घटनालाई न्युनिकरण गर्ने र लागु औषध प्रयोग र ओसार पसार घट्ने विश्वास लिईएको बताए ।
