सिन्धुली । जिल्लामा सवारी दुर्घटनाको दर हरेक वर्ष बढ्दै गएको पाईएको छ । सवारी दुर्घटनासँगै मानवीय क्षति समेत बढ्दै गएको पाईएको छ । तथापी सवारी दुर्घटनाका मुद्दा दर्ता गर्ने क्रम भने विगत वर्षको तुलनामा घटेको देखिएको छ ।
जिल्लामा सडक सञ्जालको विस्तारसँगै सवारी दुर्घटना पनि बढेको छ । तीन वर्षको जिल्ला प्रहरी कार्यालय सिन्धुलीको तथ्यांक विश्लेषण गर्दा हरेक वर्ष सवारी दुर्घटनाका घटना बढी रहेका छन ।
जिल्ला प्रहरी कार्यालय सिन्धुलीका अनुसार आर्थिक वर्ष २०७८/७९ मा ४६ वटा सवारी दुर्घटना भएका थिए । आर्थिक वर्ष २०७९/८० मा १०५ वटा दुर्घटना भएका छन भने आर्थिक वर्ष २०८०/०८१ मा १७८ वटा सवारी दुर्घटना भएका छन । जिल्ला प्रहरी कार्यालय सिन्धुलीका एसपी गोविन्दराज काफ्लेका अनुसार गत वर्षको तुलनामा यो वर्ष ४७ दशमलब ६१ प्रतिशतले दुर्घटनाको संख्या वृद्धि भएको छ ।
यस्तै जिल्लामा दुर्घटनाबाट मृत्यु हुने र घाईते हुनेको संख्यामा पनि वृद्धि भएको छ । सवारी दुर्घटनामा तीन वर्षमा ७९ जनाको मृत्यु भएको छ । यो अवधिमा १ हजार १ सय ४५ जना घाईते भएका छन ।
आर्थिक वर्ष २०७८/७९ मा ५ सय ४४ जना, आर्थिक वर्ष २०७९/८० मा २ सय ८ जना र आर्थिक वर्ष २०८०/८१ मा ३ सय ९३ जना घाईते भएका छन । घाईते हुनेको आर्थिक वर्ष २०७९/८० को तथ्यांक र आर्थिक वर्ष २०८०/८१ को तथ्यांक तुलना गर्दा जिल्लामा सवारी दुर्घटनाबाट घाईते हुनेको संख्या ५६ दशमलब ७३ प्रतिशतले वृद्धि भएको एसपी काफ्लेले बताए ।
जिल्ला प्रहरी कार्यालय सिन्धुलीका अनुसार सबैभन्दा बढी सवारी दुर्घटना चालकको लापरवाहिका कारण हुने गरेको छ । तथ्यांक अनुसार ९२ दशमलब २५ प्रतिशत दुर्घटना मानवीय अर्थात चालकको लापरवाहिका कारण हुने गरेको छ ।
पैदलयात्रीका कारण २ दशमलब ५ प्रतिशत र सवारी साधनका कारण हुने दुर्घटना २ दशमलब ५८ प्रतिशत सवारी दुर्घटना हुने गरेको प्रहरीको तथ्यांक छ । यस्तै जिल्लामा सडकका कारण १ दशमलब ९३ प्रतिशत र चौपायाका कारण शुन्य दशमलब ७४ प्रतिशत दुर्घटना हुने गरेको प्रहरीको तथ्यांक छ ।
