सिन्धुली । जिल्लाका स्थानीय तहले खर परालको छानो हटाउने अभियान चलाए पनि अझै खर परालले छाएका घर बाँकी रहेको पाईएको छ । जिल्लामा खर परालले छाएका २ हजार एक सय २४ घर बाँकी रहेको जिल्ला समन्वय समिति सिन्धुलीले जनाएको छ ।
जिल्ला समन्वय समिति सिन्धुलीले प्रकाशन गरेको जिल्ला वस्तुगत विवरण २०८१ को तथ्यांक अनुसार जिल्लामा खर परालको छाना भएका घर बाँकी रहेको पाईएको हो । विवरण अनुसार जिल्लामा रहेका घरहरु मध्ये ३ दशमलब शुन्य छ प्रतिशत घर खर, पराल र छवालीले बनाएका घर रहेका छन ।
सबैभन्दा बढी खर परालले छाएका घर दुधौली नगरपालिकामा रहेका छन । दुधौलीमा ५ सय घर खरपराल र छवालीले छाएका छन । त्यस्तै सबैभन्दा कम खरले छाएका घर घ्याङलेख गाउँपालिकामा रहेको पाईएको छ ।
त्यस्तै तीनपाटन गाउँपालिकामा ३८२, हरिहरपुरगढी गाउँपालिकामा ३६१, गोलञ्जोर गाउँपालिकामा २७३, फिक्कल गाउँपालिकामा २१७, मरिण गाउँपालिकामा १८७ घर खर परालले छाएका घर रहेको उक्त विवरणमा उल्लेख गरिएको छ । त्यस्तै कमलामाई नगरपालिकामा १४५ घर र सुनकोशी गाउँपालिकामा ४२ घरका छानामा खरको छानो रहेको छ ।
यस्तै जिल्लामा जस्ता टिन वा च्यादर लगाएका घर सबैभन्दा बढी रहेका छन । ४७ दशमलब ३४ प्रतिशत घर जस्ता, टिन, च्यादरले छाएका घर रहेको तथ्यांक छ ।
त्यस्तै टायल, खपडा, झिंगटी लगाएतले छाएका घरको संख्या पनि जिल्लामा अत्यधिक रहेको छ । जिल्लामा ३० दशमलक ९९ प्रतिशत यस्ता घर रहेको जिल्ला समन्वय समितिको तथ्यांक छ । सिमेन्ट ढलानका घरहरु १७ दशमलब २१ प्रतिशत घरहरु जिल्लामा रहेका छन । जिल्लामा ८५५ घर ढुंगा, स्लेटले छाएका छन भने काठ फ्याकले छाएका ५९ घर समेत रहेको तथ्यांकमा उल्लेख छ ।
