सिन्धुली । सदरमुकाम सिन्धुलीमाढीमा रहेको सिन्धुली बसपार्क क्षेत्रको सुरक्षाको जिम्मा महिला प्रहरीलाई दिईएको छ । जिल्ला प्रहरी कार्यालय सिन्धुलीले सदरमुकाम सिन्धुलीमाढीको सुरक्षा व्यवस्थालाई व्यवस्थित गर्ने क्रममा बसपार्क र आसपासको सुरक्षाको जिम्मेवारी महिला प्रहरीलाई दिईएको हो ।
वसपार्क र आसपासको सुरक्षा, ट्राफिक व्यवस्थापन, सरसफाई लगाएको जिम्मेवारी सहित प्रहरी हवल्दारको नेतृत्वमा महिला प्रहरीलाई वसपार्क क्षेत्रको सुरक्षामा खटाईएको हो । टोलीको नेतृत्व प्रहरी हवल्दार सुमित्रा कुमारी ओलीले गर्ने छिन । टोलीले विहिबारदेखि नै आफ्नो जिम्मेवारी सम्हालेको छ ।
उपलब्धि मूलक सुरक्षा व्यवस्था कायम हुने अपेक्षा सहित बसपार्क क्षेत्रमा महिला प्रहरीलाई खटाईएको जिल्ला प्रहरी कार्यालय सिन्धुलीका एसपी गोविन्दराज काफ्लेले बताए । महिला टोलीलाई बसपार्क, लोकतान्त्रिक चोक, चिल्ड्रेन पार्क र आसपासका बजार लगाएतको सुरक्षाको जिम्मेवारी प्रदान गरिएको एसपी काफ्लेले बताए ।
एसपी काफ्लेले सामुदायिक प्रहरीको सेवालाई समेत प्रभावकारी बनाउन विहिबार अनुगमन समेत गरिएको बताएका छन् ।
