सिन्धुली । शनिबार दिउँसो करीब ११ बजेपछिको समय, सिम सिम पानी परिरहेको थियो । एकातिर हरियो ड्रेसमा महिलाहरुले खेतको आलीमा पञ्चेबाजा घन्काएका छन । खेतभरी हिलोमा रोपाहारहरु र बाउसेहरु हिलो छ्यापा छ्याप गरिरहेका छन् । कसैले छुपुछुपु हिलोमा धानको विउ रोपेका छन । कोहि छेउ कुना खनेका छन । एक आपसमा शुभकामना पनि बाँडेका छन ।
यो दृष्य कमलामाई नगरपालिकाको धुराफाँटको हो । जहाँ नेकपा एमाले सिन्धुलीको आयोजनामा धुरा फाँटमा शनिबार धान रोपाईं गरेर धान दिवस मनाएको थियो । नेकपा एमालेका स्थायी कमिटी सदस्य एवम् वागमति प्रदेशका इन्चार्ज गुरु बरालको प्रमुख आतिथ्यतामा धान दिवस मनाईएको हो ।
पञ्चेबाजा, असारे गीत तथा हिलो छ्याप्दै नेकपा एमालेका नेता तथा कार्यकर्ताहरुले धान दिवस मनाएका हुन । कलाघर सिन्धुलीको पञ्चेबाजासँगै उक्त कार्यक्रममा साईनिङ एकेडेमीका शिक्षक विद्यार्थीहरु समेत धान दिवसमा सरिक भए ।
नेकपा एमालेका केन्द्रीय सदस्य उमा कोईराला, बागमति प्रदेश सदस्यहरु प्रदीप कटुवाल, विनोद खड्का, प्रलाद कुमार पोखरेल, मञ्जु देवकोटा लगाएतका नेताहरु, जिल्ला कमिटीका अध्यक्ष महेन्द्रदेव श्रेष्ठ, सचिव नवराज थिङ, उपसचिव दिपेश बराल तथा जिल्ला कमिटीका सदस्यहरु, कमलामाई नगरक मिटीका अध्यक्ष सुन्दर घिसिङ सहितको टिम, विभिन्न जनसंगठनका प्रमुख तथा प्रतिनिधि तथा नेकपा एमालेका कार्यकर्ता, शुभचिन्तकहरु, स्थानीयहरु सहितको सहभागितामा रोपाईं दिवस मनाईएको हो ।
असार पन्ध्र, बेठी, असारे गीतका भाका, हली, बाउसे, रोपाहार सहित धान दिवस मनाईएको हो । कमलामाई नगर कमिटीको व्यवस्थापन, अखिल नेपाल किसान महासंघको समन्वयमा कमलामाईमा धान दिवस मनाईएको थियो ।
यस्तै नेकपा एमालेले जिल्लाका सबै पालिकाका केन्द्रहरुमा रोपाईं कार्यक्रमको आयोजना गरि धान दिवस मनाएको जनाएको छ । पालिका कमिटीहरुको आयोजनामा धान दिवस मनाईएको नेकपा एमालेले जनाएको छ ।
कार्यक्रम समापनमा बोल्दै स्थायी कमिटी सदस्य गुरु बरालले रोपाईंले किसानका अनेकन आयामसँगैसंस्कृतिको समेत जगेर्ना गर्ने बताए । उनले विद्यार्थीहरुले समेत रोपाईलाई फिल्डमै अनुभूति हुने गरि पढ्ने अवसर पाएकोमा खुशी व्यक्त गरे । उनले एमाले जनताका सबै क्रियाकलापसँग प्रत्यक्ष जोडिनुपर्नेमा समेत जोड दिए ।
