सिन्धुली । स्थानीय तहको काम कति फितलो छ खोज्न टाढा जानै पर्दैन । केवल कमलामाई नगरपालिकाको गेटमा पुगे हुन्छ । कानुनत स्थानीय वस्तु र सेवा व्यापारको गुणस्तरको अनुगमन र नियमनको जिम्मा पाएको स्थानीय तहको कार्यालयको गेटमै म्याद गुज्रिएका सामान खुलेआम विक्री हुनुलाई सामान्य रुपमा लिन समेत सकिदैन । जहाँ म्याद गुज्रिएका सामान मात्र विक्री भएका छैनन पसलको बैधानिकतामा समेत प्रश्न उठेको छ ।
जिल्लाको सदरमुकाम रहेको क्षेत्र त्यो पनि कमलामाई नगरपालिका कार्यालयकै गेटमा म्याद सकिएका सामान विक्री हुँदा नगरपालिका भने मौन देखिएको छ । नगपालिकाको गेटमै सञ्चालित पसल अवैधानिक तरिकाले सञ्चालन भएको र म्याद सकिएका सामग्री विक्री भईरहेको फेला परेपछि नगरपालिका स्तरको अनुगमन समितिलाई समेत गम्भिर प्रश्न खडा भएको छ ।
कमलामाई नगरपालिका कार्यालयको गेटसँगै जोडिएको किराना पसलमा अनुगमनका क्रममा म्याद नाघेका सामग्री खुलेआम विक्री वितरण भईरहको पाईएको हो ।
किराना तथा खाद्य सामग्री र फलफूल विक्री वितरण भईरहेको उक्त पसलमा सुकेका कुहिएका फलफूल, म्याद गुज्रेका खाद्य सामग्रीहरु खुलेआम विक्री भईरहेको फेला परेको छ भने उक्त पसलको वैधानिक दर्ता समेत भेटिएको छैन ।
दर्ता प्रमाणपत्र र प्यान नम्बर सन्देश रेडिमेट सेन्टरको नाममा रहेको तर किराना र फलफूल पसल सञ्चालनमा रहेको पाईएको हो । दर्ता एउटा र पसलमा फरक कारोबार भेटिएपछि अनुगमन समितिले ‘कपडा र जुत्ता मात्र विक्री गर्ने’ सुझाव दिएको छ ।
उक्त पसलसँग ५२ हजार ७७० रुपैंया बराबरको म्याद नाघेका प्याकिङ सामानहरु बरामद गरिएको छ । सरोज बुढाथोकीले सञ्चालन गरेको उक्त पसलमा विक्रीको बिल समेत नभएको पाईएको छ । उक्त पसल लगभग रित्तो हुने गरि सामान निकालिएको छ ।
यस्तै सिन्धुली बसपार्क नजिकै धुराबजार जाने बाटोमा रहेका होटलहरुमा पनि खुला र ढुसी आएका खानेकुरा राखिएको, खुल्ला रुपमा खानेकुरा राखेर विक्री वितरण गरिएको पाईएको छ । यहाँको विन्दबासिनी खाजा घरमा यस्ता सामग्री फेला परेको हो । त्यहाँ खुल्ला लोकल मदिरा विक्री वितरण गरेको समेत पाईएको छ । यस्तै म्याद गुज्रेका पेय पदार्थ समेत पाईएको छ ।
जिल्ला स्तरीय अनुगमन समितिले बसपार्क आसपास, स्टल बजार, धुराबजारका ४८ किराना तथा खाद्य पसल र केहि खुला होटलमा समेत अनुगमन गरेको छ । अनुगमनमा १५ वटा पसलमा म्याद गुज्रेका सामग्री फेला परेको छ । अनुगमन समितिले ६७ हजार २ सय ५१ रुपैंया बराबरको म्याद गुज्रेका खान अयोग्य सामग्री बरामद गरि नष्ट गरेको छ ।
अनुगमनमा म्याद सकिएका सामग्री मात्र हैन लेवल नलगाएका सामग्रीहरु समेत विक्री भएका छन । अधिकांश पसलमा साईनवोर्ड नराखिएको, कतिपय पसलहरु दर्ता र करको दायरामा नआएको पाईएको छ ।
साईनवोर्ड होटलको, पसल किराना
अनुगमनका क्रममा देखिएको अर्को रोचक विषय भनेको साईनवोर्डमा होटलको नाम र कारोबार किराना हो । कमलामाई नगरपालिका वडा नं. ६ धुराबजारमा रहेको एक पसलमा यस्तो दृष्य देखिएको हो । दिदीबहिनी खाजा घर लेखिएको बोर्ड र भित्र होटल नभएको पाईएको छ । जहाँ होटल नभई किराना पसल सञ्चालनमा रहेको पाईएको छ । उक्त पसल दर्ता रहेको समेत पाईएको छैन । म्याद गुज्रेका सामान समेत पाईएको छ ।
स्थानीय तहलाई अनुगमनको जिम्मा कानुन त छ । स्थानीय सरकार सञ्चालन ऐनले नै बजार अनुगमन गर्ने र नियमन गर्ने अधिकार स्थानीय तहलाई दिएको छ । ऐनको दफा ११ उपदफा ञ ५ मा स्थानीय वस्तु र सेवा व्यापारको गुणस्तरको अनुगमन र नियमन गर्न सक्ने व्यवस्था उल्लेख छ ।
स्थानीय तहका उपप्रमुख वा उपाध्यक्षको नेतृत्वमा स्थानीय बजार अनुगमन समिति रहन्छ । उक्त समितिले बजार र गुणस्तरदेखि मुल्य समायोजन समेतको काम गर्ने अधिकार रहन्छ र कारावाहि गर्ने समेत अधिकार रहन्छ । मुल्य निर्धारण गर्ने अनुगमन गर्ने लगाएतका काम स्थानीय तहले गर्छ तर कमलामाई नगरपालिकाको मुख्य बजार क्षेत्रमै मुल्य सूचि समेत नराखी व्यवसायहरु सञ्चालन भईरहेका छन । अखाद्य वस्तुको खुलेआम विक्री वितरण भईरहेको छ । कमलामाई नगरपालिकाका उपप्रमुख मञ्जु देवकोटाले चाडवाड लक्षित बजार अनुगमन केहि दिनमा गरिने बताईन ।
अनुगमनमा जिल्ला प्रशासन कार्यालयका प्रतिनिधि, कमलामाई नगरपालिकाका प्रतिनिधि, उपभोक्ता हितमा क्रियाशिल संंस्थाका प्रतिनिधि, घरेलु तथा साना उद्योग विकास कार्यालय, खाद्य प्रविधि तथा गुण नियन्त्रण डिभिजन कार्यालय, सिन्धुली उद्योग वाणिज्य संघका पदाधिकारी, सुरक्षा निकाय लगाएतका सरोकारवालाको सहभागिता रहेको थियो ।
