सिन्धुली । गोलञ्जोर गाउँपालिकाका अध्यक्ष शंकरराज बरालले परिश्रम नगरि फल प्राप्त नहुने भएकाले किसानलाई परिश्रम गरेर दुध उत्पादनमा लाग्न आग्रह गरेका छन । उनले महाभारत दुग्ध उत्पादक सहकारी संस्थामा आवद्ध किसानहरुलाई सम्बोधन गर्दै उत्पादनमा लागेका किसानलाई गाउँपालिकाले सहयोग गर्ने बताए ।
उनले गाउँपालिकाले यसै वर्षदेखि दुधमा ३ रुपैंया प्रतिलिटर अनुदान दिन कार्यविधि तयार गरेको र कार्यान्वयनमा जाने समेत बताएका छन । शुक्रबार महाभारत दुग्ध उत्पादक सहकारी संस्था, गोलञ्जोर ५ ले सहकारीमा आवद्ध दुग्ध उत्पादक किसानहरुलाई अनुदान वितरण गर्न आयोजना गरेको कार्यक्रममा बरालले यस्तो बताएका हुन ।
अध्यक्ष बरालले आर्थिक, प्राविधिक सहयोग गर्न गाउँपालिका तयार रहेको बताए । बरालले किसानलाई पशु विमा गर्न समेत आग्रह गरेका छन । ‘पशु विमाका लागि गाउपालिकाबाट सहयोग गर्छौं, बिमा गर्नुस,’ बरालले किसानलाई भने ।
कार्यक्रममा बोल्दै गाउँपालिकाका उपाध्यक्ष ज्वाला प्रसाद न्यौपानेले उत्पादित वस्तुमा अनुदान दिदा वास्तविक किसानले अनुदान पाउने बताए । उनले उत्पादनमा दिएको अनुदान दुरुपयोग भएकाले उत्पादित वस्तुका आधारमा दिईने अनुदान प्रभावकारी हुने बताए । न्यौपानेले ढुक्क भएर दुध उत्पादनमा लाग्न किसानलाई आग्रह समेत गरे ।
महाभारत दुग्ध उत्पादक सहकारीले बाग्मति प्रदेश सरकारको पशुपंछि तथा मत्स्य विकास निर्देशनालय मकवानपुरले दिएको अनुदान रकम वितरण गरेको हो । निर्देशनालयले उक्त सहकारीमा आवद्ध १३८ जना किसानलाई प्रतिलिटर ३ रुपैंया पचास पैसाका दरले अनुदान उपलब्ध गराएको थियो ।
किसानहरुलाई २ लाख ७७ हजार ६४४ लिटर दुधको अनुदान दिईएको छ । पशुपंछि तथा मत्स्य विकास निर्देशनालय मकवानपुरको ८ लाख १ हजार ८४६ रुपैंया अनुदान रहेको थियो भने सहकारीले १ लाख ६९ हजार ९०८ रुपैंया थप गरि ९ लाख ७१ हजार ७५४ रुपैंया रकम अनुदान दिइएको सहकारी संस्थाका अध्यक्ष नवराज गजुरेलले बताए । महाभारत सहकारीमा आवद्ध कृषि समूहका किसानहरुले उक्त अनुदान पाएका हुन ।
सहकारी मार्फत सञ्चालनमा आएका चारवटा दुध संकलन केन्द्रका किसानहरुले उक्त रकम पाएका हुन । उक्त अनुदान रकम आर्थिक वर्ष २०७८/७९ को रहेको सहकारीका अध्यक्ष गजुरेलले बताए । उनले सहकारीले किसानलाई किसान कार्डको व्यवस्था गर्न लागिएको समेत जानकारी दिए । उनले आर्थिक वर्ष २०७९/८० को अनुदान रकम पनि तुरुन्तै वितरण गर्ने तयारी रहेको बताए ।
उक्त कार्यक्रममा खनियाँखर्क संकलन केन्द्रका २८ जना, राजपानी संकलन केन्द्रका ११५ जना मधुटार संकलन केन्द्रका २८ जना, साखाजोर संकलन केन्द्रका १५ जना किसानले अनुदान पाएका छन ।
उक्त कार्यक्रममा बोल्दै दुध संकलक तथा वितरणको जिम्मा लिएको कोशेली डेरी उद्योगका अध्यक्ष बिमला काफ्लेले किसानले उत्पादन गरेको दुध विक्री नहुने समस्या हुन नदिने बताईन । उनले भनिन, ‘दुध उत्पादन गर्नुस, बजार व्यवस्थापनको काम कोशेली डेरीले गर्छ ।’
