सिन्धुली । नेपाल पूर्व प्रहरी संगठन सिन्धुलीको ३४ औं स्थापना दिवसको अवसरमा निःशुल्क व्लड बैंक स्थापनाका लागि आर्थिक सहयोग गरिएको छ ।
शुक्रबार सिन्धुलीमाढीमा आयोजित औपचारिक कार्यक्रममा नेपाल रेडक्रस सोसाईटीलाई संगठनले आर्थिक सहयोग गरेको हो । संगठनका अध्यक्ष हिरालाल श्रेष्ठले नेपाल रेडक्रस सोसाईटी सिन्धुलीका सभापति अशोक श्रेष्ठलाई एकलाख पाँच हजार रकम हस्तान्तरण गरे ।
रेडक्रसले १ करोडको अक्षय कोष स्थापना गरि रगत निःशुल्क उपलब्ध गराउन अभियान थालेको छ । सोहि अभियानलाई साथ दिन संगठनले आर्थिक सहयोग गरेको हो । संगठनको तर्फबाट २५ हजार, संगठनका बाग्मति प्रदेश संरक्षक राम बहादुर हायुबाट २५ हजार र अन्य ११ जनाबाट ५/५ हजार रकम उपलब्ध गराई एकमुष्ट हस्तान्तरण गरिएको हो । दिलिप कुमार थापा, रघु लामा, हिरा लाल श्रेष्ठ, पदम बहादुर श्रेष्ठ, चोचल राज पाख्रिन, शेर बहादुर श्रेष्ठ, नारायण बहादुर कार्की, विष्णु प्रसाद अधिकारी, श्री बहादुर लुङ्गेली, कर्ण बहादुर श्रेष्ठ, र मेख बहादुर थापाले जनहि पाँच पाँच हजार रुपैंया सहयोग गरेका हुन ।
रेडक्रसले नागरिकका तर्फबाट ५० लाख र जिल्लाका नौ स्थानीय तहबाट ५० लाख संकलन गरि अक्षय कोष स्थापना गर्ने अभियान सुरु गरेको छ । २०७३ सालदेखि सुरु भएको व्लड बैंकले सशुल्क रगत उपलब्ध गराउँदै आएकोमा अक्षय कोष स्थापनापछि रगत निशुल्क गरिने रेडक्रसका सभापति अशोक श्रेष्ठले बताए ।
