सिन्धुली । नेपाल निजामति कर्मचारी संगठनले भवन निर्माण गर्ने भएको छ । कर्मचारी संगठनको अगुवाईमा कर्मचारी वचत तथा ऋण सहकारी संस्थाको नाममा भवन बनाउन लागेको हो ।
कमलामाई नगरपालिका वडा नं. ५ मधुटारमा रहेको जग्गामा भवन निर्माण गरिने भएको हो । भवनको शिलान्यास शुक्रबार कर्मचारी संगठनका केन्द्रीय अध्यक्ष लेखनाथ कोइराला र सिन्धुलीका प्रमुख जिल्ला अधिकारी सुनिता नेपालले संयुक्त रुपमा गरेका छन । तीनतलाको भवनको प्रत्येक तलामा बैठक हल सहित ४ वटा कोठा रहनेछन ।
तत्कालै निर्माण सुरु गरिने उक्त भवनको एकवर्षभित्र एकतला भवन निर्माण सम्पन्न गर्ने लक्ष लिईएको नेपाल निजामति कर्मचारी संगठनका सचिव डिल्ली सौगात घिमिरेले बताए । उनका अनुसार भवन निर्माणका लागि ७५ लाख लागत लाग्ने अनुमान गरिएको छ । उक्त भवनको नाम मनोज–झपेन्द्र–सुरेन्द्र स्मृति भवन दिईएको छ ।
उक्त भवन नेपाल निजामती कर्मचारी संगठन(नेगो) र कर्मचारी बचत तथा ऋृण सहकारी संस्था लिमिटेड र सहयोग दाताहरुको सहयोगमा निर्माण हुने भएको हो ।
शिलान्यास कार्यक्रमलाई सम्बोधन गर्दै संगठनका अध्यक्ष लेखनाथ कोईरालाले संघीय निजामती सेवा ऐनका सम्बन्धमा संगठनको तर्फबाट कर्मचारीको सेवा सुविधा र सेवा वृत्ति विकासका विषयमा देशभरबाट सुझाब सङ्कलन गरेर सरकार तथा प्रतिपक्षमा रहेका सबै राजनीतिक दलका अध्यक्षहरू समक्ष सुझाब सहितका मागहरू राखिएको बताए ।
यस्तै कार्यक्रममा बोल्दै प्रमुख जिल्ला अधिकारी सुनिता नेपालले कर्मचारीले सार्वजनिक सेवा प्रवाहमा सेवाग्राहि सन्तुष्ट हुने गरी सेवा प्रवाह गर्न आग्रह गरेकी छिन ।
