सिन्धुली । झण्डै एकसय चौतिस किलो गाँजा सहित शनिबार सिन्धुलीमा तीनजना पक्राउ परेका छन । पक्राउ पर्नेमा रौतहको गौर नगरपालिका – ७ का २२ वर्षका विकास प्रसाद यादव र गौर नगरपालिका– ५ का २४ वर्षीय अभयकुमार गुप्ता रहेका छन । उनीहरुलाई गाँजा सहित पक्राउ गरिएको जिल्ला प्रहरी कार्यालय सिन्धुलीले जनाएको छ ।
उनीहरुलाई इलाका प्रहरी कार्यालय भिमानले भिमानको चेकपोष्टमा चेकजाँचका क्रममा पक्राउ गरेको हो । काठमान्डौबाट रौतहटतर्फ जाँदै गरेको विआर०६पिए६१८४ नम्बरको भारतीय नम्बर प्लेटको स्कारपियोको छतमा राखिएको प्याक गरिएको गाँजा बरामद गरेको हो ।
बरामद गरिएको गाँजा एक सय ३३ दशमलव ९८८ किलो रहेको जिल्ला प्रहरी कार्यालय सिन्धुलीले जनाएको छ । यसअघि पनि प्रहरीले लागु औषध ओसारपसार गर्ने पाँच जनालार्ई पाँचवटा मोटरसाइकल सहित नियन्त्रणमा लिइएको थियो । लागु औषध ओसारपसारका घटना जिल्लामा बढ्दै गएको प्रहरीले जनाएको छ ।
