सिन्धुुली । जिल्लामा हालसम्म १०७ जना एचआईभि संक्रमितको पहिचान भएको छ । उनीहरु मध्ये ७० जनाले सिन्धुली अस्पतालको एआरटी शाखाबाट औषधि सेवन गर्ने गरेका छन । अन्य ३० जना भने जिल्लामा उपलब्ध छैनन । संक्रमितलाई गरिने सामाजिक अपमान र गलत व्यवहारका कारण जिल्लाबाट एचआईभी संक्रमितहरु जिल्लामा बस्न छोडेको पाईएको एचआईभि संक्रमितहरुका लागि काम गर्ने संस्था सिन्धुली प्लसका अध्यक्ष सुजन थापाले बताए ।
जिल्लामा हालसम्म फेला परेका संक्रमितहरुमध्ये ३ वर्षिय बालिका देखि ७० वर्षसम्मका व्यक्तिहरु रहेका छन । एचआईभी संक्रमितको सवालमा विगत सातवर्षदेखि काम गरिरहेको सिन्धुली प्लसका अध्यक्ष थापाका संक्रमितहरु नखुल्ने गरेका कारण पहिचानमा समस्या हुने गरेको बताए ।
उनका अनुसार जिल्लामा एक घरमा तीन जनासम्म संक्रमितहरु पाईएका छन । संक्रमितमध्ये ३ जनाको मृत्यु भईसकेको छ । २ महिला र २ पुरुष गरि ४ जनालाई संस्थाको सामुदायिक हेरचाह केन्द्रले काठमान्डौ रिफर गरेको थापाले बताए । एचआईभि÷एड्स संक्रमितहरु सबैभन्दा धेरै कमलामाई नगरपालिकामा ३५ जना भेटिएका छन ।
संक्रमितहरु प्रायः श्रीमान श्रीमति नै रहेका छन । एचआईभि÷एड्स संक्रमितहरुको हेरचाह तथा उपचारमा काम गर्दै आएको संस्था सिन्धुली प्लसले जिल्लामा एचआईभि÷एड्स संक्रमितहरुको खोजी, तथ्यांक संकलन, नियमित औषधि सेवनका लागि उपचारमा सहयोग लगाएतका काम गर्दै आएको छ भने संक्रमितहरुले सिन्धुली अस्पतालको एआरटिमार्फत औषधि सेवन गर्छन ।
सामुदायिक सेवा केन्द्रको सहजीकरणमा एक बालिका सहित ७० जना विरामीले नियमित औषधि सेवन गरिरहेका छन । विशेष गरि लागु औषध सेवनकर्ता, विदेश तथा भारतमा काम गर्न गएर फर्केकाहरुसँगको यौन सम्बन्ध र रगतको माध्यमबाट पनि एड्स लागेको पाईएको संक्रमितहरुसँगको छलफलमा पत्ता लागेको थापाले बताए ।
गाउँगाउँमा गएर रगत परिक्षण गर्ने हो भने यो संख्या दोब्बर नाघ्न सक्ने अनुमान रहेको संस्थाले जनाएको छ । संक्रमितहरु धेरै जसो बैदेशिक रोजगारीबाट फर्किएका, सवारी चालकहरु, लागु औषध प्रयोगकर्ता नै रहेको संस्थाले जनाएको छ ।
सिमित बजेटका कारण जिल्लाभर रगत परिक्षण शिविर लिएर जान नसकेको पनि उनले बताए । एचआईभि/एड्सका बारेमा सचेतता कम भएकाले रोग फैलन सक्ने खतरा पनि उत्तिकै रहेको उनले बताए । पछिल्लो समय सिन्धुली अस्पताल सिन्धुलीमा एड्सका विरामीहरुको निशुल्क जाँच गरिदै आएको छ । उनीहरु सामाजिक र आर्थिक रुपमा पछाडि परेको छन । उनीहरुको जीविको पार्जन तथा संरक्षणमा स्थानीय सरकारले ध्यान नदिएको पनि उनले बताए ।
