सिन्धुली/जिल्लाका स्थानीय तहको बेरुजु ९८ करोड ४४ लाख ९८ हजार देखिएको छ । महालेखा परिक्षकको प्रतिवेदनले जिल्लाका नौ स्थानीय तहमा बेरुजु अत्यधिक रहेको देखाएको हो । प्रतिवेदनले गत वर्षको बेरुजु फस्र्याैटमा समेत जिल्लाका स्थानीय तहहरुलाई कमजोर मापनमा रहेको देखाएको छ ।
महालेखा परिक्षकको कार्यालयले सार्वजनिक गरेको प्रतिवेदन अनुसार आर्थिक वर्ष २०७८/७९ मा मात्रै जिल्लाका स्थानीय तहको बेरुजु ४६ करोड ६३ लाख ७३ हजार देखिएको छ । गतबर्षको फस्र्यौट हुन नसकेको बेरुजु ६२ करोड ३७ लाख ७ हजार रहेको छ ।
जिल्लाका दुई नगरपालिका र ७ गाउँपालिकामा असुल गर्नुपर्ने बेरुजु रकम ४ करोड ७० लाख ८३ हजार देखिएको छ । यस्तै कागजात तथा प्रमाण पेश गर्नुपर्ने रकम २३ करोड ५६ हजार रहेको छ ।
लेखा परिक्षणको प्रक्रियामा स्थानीय तहले ७ करोड ६४ लाख २० हजार रुपैंया बेरुजु फस्र्याैट गरेका छन । स्थानीय तहले नियमित गर्नुपर्ने रकम १० करोड ९५ लाख ९१ हजार देखिएको छ ।
सबैभन्दा बढी बेरुजु तीनपाटनको दोस्रोमा सुनकोशी
सिन्धुलीमा सबैभन्दा बढी बेरुजु तीनपाटन गाउँपालिकाको देखिएको छ । गाउँपालिकाको जम्मा अध्यावधिक बेरुजु २६ करोड ९२ लाख ७० हजार देखिएको हो । आर्थिक वर्ष २०७८/७९ मा मात्रै उक्त गाउँपालिकाको बेरुजु ८ करोड ४४ लाख ६५ हजार आएको छ । गत वर्षको बेरुजु फस्र्याैटमा समेत गाउँपालिका कमजोर देखिएको छ । गाउँपालिकाको १९ करोड १७ लाख ९ हजार रकम गत वर्षको बेरुजु फस्र्याैट भएको छैन । तीनपाटन पछि बढी बेरुजु हुनेमा सुनकोशी गाउँपालिका रहेको छ । यो गाउँपालिकाको १९ करोड तीन लाख ३ हजार रुपैंया बेरुजु अध्यावधिक छ । आर्थिक वर्ष २०७८/७९ मा मात्रै यो गाउँपालिकाको बेरुजु ७ करोड ५१ लाख २७ हजार रहेको छ ।
सबैभन्दा कम बेरुजु गोलञ्जोरको
गोलञ्जोर गाउँपालिकाको बेरुजु जिल्लाका अन्य स्थानीय तहभन्दा कम देखिएको छ । यो पालिकाको अध्यावधिक वेरुजु ४ करोड ९९ लाख ९० हजार रहेको छ । आर्थिक वर्ष २०७८/७९ को बेरुजु २ करोड ६७ लाख ७८ हजार रहेको छ । विगत वर्षको २ करोड ३२ लाख १२ हजार वेरुजु रकम फस्र्याैट भएको छैन ।
महालेखा परिक्षकको कार्यालयले सार्वजनिक गरेको लेखा परिक्षण प्रतिवेदनमा कमलामाई नगरपालिकाको ९ करोड ६५ लाख ५५ हजार, हरिहरपुरगढीको ६ करोड ८५ लाख ७९ हजार, फिक्कल गाउँपालिकाको ९ करोड ३३ लाख ३१ हजार, घ्याङ्लेख गाउँपालिकाको ९ करोड ७३ लाख ८९ हजार, दुधौली नगरपालिकाको ६ करोड १८ लाख ९१ हजार र मरिण गाउँपालिकाको ५ करोड ७१ लाख ९० हजार बेरुजु अध्यावधिक गरिएको छ ।
आर्थिक वर्ष २०७८/०७९ को प्रतिवेदन अनुसार जिल्लाका स्थानीय तहहरुमा वेरुजु असुल गर्नुपर्ने रकम ४ करोड ७० लाख ८३ हजार रुपैंया रहेको छ । यसरी असुल गर्नुपर्ने रकम पनि तीनपाटन गाउँपालिकाको सबैभन्दा बढी देखिएको छ । उक्त गाउँपालिकाको असुल गर्नुपर्ने रकम १ करोड ३३ लाख रहेको छ । असुल गर्ने रकम कमलामाई नगरपालिकाको ९५ लाख ४ हजार, सुनकोशी गाउँपालिकाको ४२ लाख ६७ हजार, हरिहरपुरगढी गाउँपालिकाको ८ लाख ४४ हजार, फिक्कल गाउँपालिकाको ७९ लाख २९ हजार, गोलञ्जोर गाउँपालिकाको १८ लाख २४ हजार, घ्याङलेख गाउँपालिकाको ६९ लाख ७२ हजार, दुधौली नगरपालिकाको ११ लाख १९ हजार र मरिण गाउँपालिकाको १३ लाख २४ हजार रकम रहेको छ ।
कागतपत्र प्रमाण विना भुक्तानी दिनेमा सुनकोशी अगाडि
स्थानीय तहहरुले कागजात प्रमाणपत्र विना नै भुक्तानी दिने गरेको खुलेको छ । यस्तो रकम २३ करोड ५६ हजार रहेको छ । यसरी कागजपत्र प्रमाण विना भुक्तानी दिने स्थानीय तहमा सुनकोशी गाउँपालिका अग्रस्थानमा देखिएको छ । उक्त पालिकाले ५ करोड ९४ लाख ७३ हजार प्रमाण नपुराई भुक्तानी दिएको प्रतिवेदनमा उल्लेख छ ।
कमलामाई नगरपालिकाको ४ करोड ४१ लाख, ८२ हजार, तीनपाटन गाउँपालिकाको ३ करोड २९ लाख ८३ हजार, घ्याङलेख गाउँपालिकाको २ करोड ८१ लाख ९१ हजार, गोलञ्जोर गाउँपालिकाको १ करोड ५१ लाख ७९ हजार, हरिहरपुरगढी गाउँपालिकाको २ करोड ६८ लाख ७६ हजार, फिक्कल गाउँपालिकाको १ करोड ७० लाख १० हजार, दुधौली नगरपालिकाको ३१ लाख ११ हजार र मरिण गाउँपालिकाको ३० लाख ६१ हजार रकम कागजपत्र प्रमाण नपुगी भुक्तानी दिएको प्रतिवेदनमा उल्लेख छ ।
महालेखाले सबै स्थानीय तहलाई महालेखा परिक्षकबाट स्वीकृत नेपाल सार्वजनिक क्षेत्र लेखामानको ढाँचा पूर्ण रुपमा प्रयोग गरि वित्तिय विवरण तयार नगरेको प्रतिवेदनमा उल्लेख गरेको छ ।
सबै स्थानीय तहले लेखालाई प्रचलित कानुन बमोजिम व्यवस्थित नगरेको, विकास निर्माण र सेवा प्रवाह प्रभावकारी नबनाएको, कर्मचारीको दरबन्दी पुरा नगरेको, वितरणमुखी कार्यक्रम सञ्चालन गरेको, आन्तरिक नियन्त्रण प्रणाली कमजोर रहेको, अनुदानको प्रयाप्त अनुगमन नभएको लेखा परिक्षण प्रतिवदेनमा औल्याईएको छ ।
