सिन्धुली/जिल्लामा २०७९ को एसईईमा २ सय ९६ जनाले ए प्लस ल्याएका छन । विहिबार सार्वजनिक भएको नतिजा अनुसार जिल्लामा ३.६ देखि ४ जिपिएसम्म नतिजा ल्याउने विद्यार्थी साधारणतर्फ २८४ जना र प्राविधिक तर्फ १२ जना रहेका छन । जुन नतिजा ए प्लस मानिन्छ ।
शिक्षा विकास तथा समन्वय ईकाई सिन्धुलीका अनुसार सिन्धुली जिल्लामा ३७० साधारण र ७८ प्राविधिक तर्फका गरि ४४८ जनाले ए अर्थात ३.२ देखि ३.६ जिपिएसम्मको नतिजा ल्याएका छन । यस्तै २.८ देखि ३.२ जिपिए अर्थात वि प्लस ल्याउनेको संख्या ७८१ रहेको छ भने २.४ देखि २.८ सम्मको नतिजा अर्थात वि ल्याउनेको संख्या १ हजार ३३६ रहेको छ । त्यस्तै सि प्लस ग्रेड लाउनेको संख्या १ हजार ४ सय ३२ र सि गे्रड ल्याउने ६ सय ६२ जना रहेका छन ।
डि ग्रेड ल्याउने १५७ जना नन ग्रेड नतिजा ल्याउने ९ जना रहेको शिक्षा विकास तथा समन्वय ईकाई सिन्धुलीले जनाएको छ ।
जिल्लामा ५ हजार २ सय ८ जना विद्यार्थीले एसईई फारम भरेकोमा ८७ जना परिक्षामा अनुपस्थित रहेका थिए । जसमा प्राविधिक धार तर्फ १७५ जना विद्यार्थीले परिक्षा दिएका थिए ।
बाबुछोरा सँगसँगै एसईई पास
सिन्धुलीको घ्याङ्लेखका एकैघरका बाबुछोराले एकैपटक एसईई पास गरेका छन । घ्याङलेख गाउँपालिका वडा नं. ४ का चक्रबहादुर पाख्रिनले आफ्नो कान्छो छोरासँगै एसईई पास गरेका हुन । पूर्व वडा अध्यक्ष समेत रहेका पाख्रिनले पढाई छोडेको ३० वर्षपछि छोरासँगै एसईई दिएर पास गरेका हुन । उनले जनजागृति माध्यमिक विद्यालय गोपेबाट एसईई पास गरेका हुन । उनले मा.वि. हायूटार केन्द्रबाट परीक्षा दिएका थिए ।
पाख्रिनले कान्छा छोरा युवराज पाख्रिनसँगै एसईई दिएका थिए । उनले २.१५ जिपिए ल्याई एसईई पास गरे भने युवराजले २.६५ जिपिए ल्याएर एसईई पास भए ।
२०४९ सालमा एसएलसी दिने तयारी भई रहँदा पारिवारिक समस्याका कारण पढाई छाडेका उनले तीस वर्षपछि एसईई दिएका थिए ।
उनी नेकपा माओवादी केन्द्रका गाउँपालिका कमिटी अध्यक्ष हुन । जनप्रतिनिधि भएर काम गर्दा शैक्षिक योग्यताको आवश्यकता महसुस भएपछि छोरासँगै स्कुल भर्ना भएर एसइई दिएको उनले बताए । कक्षा ९ मा पढाई छोडेका उनले एसईई पास भएपछि पढाईलाई अगाडि बढाउने बताएका छन । उनी अहिले ४७ वर्षका भए । पाख्रिनका दुई भाई छोराहरुले स्नातक पढाई सकेका छन् भने तीन छोरीहरु जनजागृति मावि गोपेमा अध्ययनरत छन् ।
