सिन्धुली । सिन्धुली अस्पतालमा मंगलबार साँझ तोडफोड भएको छ । कनपा ५ सिलामेकी २६ वर्षकी गंगा गुरुङ श्रेष्ठको अस्पतालमा सुत्केरी हुन नसकेपछि अस्पतालले ट्रमा सेन्टरमा रिफर गरेकोमा बाटोमै जाँदा मृत्यु भएपछि मृतकका आफन्तले सिन्धुली अस्पतालमा तोडफोड गरेका हुन ।
गर्भवति महिलालाई मंगलबार विहान १० बजे तिर सिन्धुली अस्पतालमा ल्याईएको थियो । अस्पतालले दिउँसो ३ बजे नै उनलाई रिफर गरेको थियो । गर्भवतिलाई उपचारका लागि परिवारले वर्दिवास लगेका थिए । बर्दिवास नपुग्दै उनको मृत्यु भईसकेको थियो ।
मृतकका आफन्तले डाक्टरको लापरवाहिका कारण गर्भवति महिलाको मृत्यु भएको भन्दै डाक्टरलाई कारवाहिको माग गरेका छन । अस्पतालमा ढुंगा मुढा र लठ्ठी सहित मृतकका आफन्त तथा परिवारले तोडफोड गरेका हुन । उनीहरुले बन्दै गरेको सिन्धुली अस्पताल र अस्पतालको इमर्जेन्सी कक्षको झ्यालका सिसाहरु तोडफोड गरेका छन । तोडफोडका क्रममा प्रहरीसँग झडप हुदा प्रहरी इन्सपेक्टर रामभक्त भट्टराई घाईते भएका छन ।
आन्दोलनकारीले लठ्ठीले हान्दा इन्स्पेक्टर भट्टराईको टाउकोमा चोट लागेको जिल्ला प्रहरी कार्यालय सिन्धुलीका एसपी राजकुमार सिलवालले बताए । इन्स्पेक्टर भट्टराईको सिन्धुली अस्पतालमा उपचार गरिएको छ । एसपी सिलवालका अनुसार सिन्धुली अस्पतालमा थप क्षती हुन नदिनका लागि शसस्त्र प्रहरीका डिएसपी र जनपथ प्रहरीका डिएसपीको नेतृत्वमा सुरक्षाकर्मीहरु खटाईएको छ ।
आन्दोलनकारीले विपी राजमार्ग करीब एक घण्टा अवरुद्ध गरेका थिए । अहिले सडक खुलाईएको छ । टायर बालेर उनीहरुले सडक अवरुद्ध गरेका हुन । त्यस्तैै अस्पताल अगाडी पेट्रोल खन्याएर सडकमा आगो बालेका छन भने निर्माणाधिन अस्पतालका सटिङका काठहरु सडकमा ल्याएर बालेका छन ।
मृतकका आफन्तले डाक्टरको कारवाहिको माग गर्दै नाराबाजी समेत गरेका छन । अहिले पनि भिड नियन्त्रणमा लिन सकेको छैन । भिड नियन्त्रणमा लिन नसकेपछि प्रहरीले भिड नियन्त्रणमा लिन अश्रुग्याँस प्रहार गरेको छ साथै एक राउण्ड हवाई फायर समेत गरेको छ ।
मृतकका आफन्तले डाक्टरले उपचारका क्रममा प्रयोग गरेको इन्जेक्सनका बारेमा शंका व्यक्त गरेकाले छानविनका लागि समिति बनाउन छलफल भईरहेको एसपी सिलवालले बताएका छन । प्राविधिक विषय भएकाले अनुसन्धान नगरि केहि भन्न नसकिने उनले बताए ।
उनका अनुसार पहिलो चरणको छलफलबाट बुधबार विहान बैठक बसी समिति बनाउने मृतकका आफन्तसँग सहमति भएको छ । पीडित पक्ष, अस्पताल प्रशासन र स्थानीय प्रशासनबीच भएको छलफलमा बुधबार विहान ८ बजे छलफल गरि छानविन समिति बनाउने समझदारी भएको एसपी सिलवालले जानकारी दिएका छन । मृतकको शव सिन्धुली अस्पतालमा पोष्टमार्टमका लागि ल्याईएको छ ।
तस्वीरहरु : उद्धव श्रेष्ठ
