सिन्धुली । नेपाल सरकारले बाहेक मरिण गाउँपालिकाले गर्भवति महिलाले गर्भ जाँच गरेवापत प्रोत्साहन भत्ता दिने भएको छ । यहि आर्थिक वर्षदेखि लागु हुने गरि मरिण गाउँपालिकाले गर्भवति महिला प्रोत्साहन भत्ताको व्यवस्था गरेको हो ।
गाउँपालिकाको गाउँसभाले गर्भवती महिलाहरूको लागि प्रत्येक पटक स्वास्थ्य संस्थामा जाँच गराए बापत ५०० का दरले चार पटकको दुई हजार रुपंैया प्रोत्साहन भत्ता दिने भएको हो । उक्त बजेट साउन १० गते गाउँसभाबाट पास भएको गाउँपालिकाले जनाएको छ ।
गाउँपालिकाले आफ्नो आधिकारीक वेवसाईड मरिणमुन डट जिओभि डट एनपीमा आफ्नो बार्षिक कार्यक्रम सार्वजनिक गर्दै उक्त कुरा उल्लेख गरेको छ । यस्तै गाउँपालिका भित्रका बाल विकास केन्द्रका सहयोगी कार्यकर्ताको तलब १० हजार पुराएको छ । बालविकास केन्द्र नभएका १९ वटा विद्यालयमा बालविकास केन्द्र स्थापना गर्ने र बालविकास केन्द्र भएका २९ विद्यालयका सहयोगी कार्यकर्तालाई पनि ४ हजार रुपैंया तलब वृद्धि गरि १० हजार पुराइएको छ ।
यस्तै मावि, निमावि तथा प्रावि विद्यालयहरु सञ्चालन भई शुन्य दरबन्दी भएका विद्यालयहरुलाई समेत अनुदानको व्यवस्था गरेको गाउँपालिकाले जनाएको छ । यस्तै स्थानीय पाठ्यक्रम निर्माणको लागि वजेट व्यवस्था र अन्तर मा.वि. छात्रछात्रा भलिवल प्रतियोगीको लागि बजेट व्यवस्था गरेको गाउँपालिकाले जनाएको छ ।
