सिन्धुली । अदालतको फैसला कार्यान्वयन गर्ने भन्दै सिन्धुली जिल्ला अदालतले घरमा भएका सामान निकाली बसीरहेको घरमा ताल्चा लगाईदिएपछि सडकमा पुगेकी कनपा ७ बर्देउटारकी ६३ वर्षिय लक्ष्मी गुरुङले केहि राहत पाउने भएकी छिन । अदालतको फैसला बमोजिम महेश भुषाल (उनकी श्रीमति मनमाया), कनपा ६ पानीट्यांकीकी धनकुमारी प्रधान, कनपा ७ बर्देउटारकी चुडा कुमारी गौतमको नाममा पास भएको जग्गा बेचेर ऋण चुक्ता गरी बाँकी रहेको १२ लाख रकम लक्ष्मीलाई बास निर्माणका लागि दिईने भएको हो ।
कानुन भन्दा मानवीयता र सामाजिक न्याय ठूलो भन्दै स्थानीयबासी, नागरिक समाज तथा मिडियाको दवाव परेपछि विपक्षीहरुले लक्ष्मीलाई जग्गा बेचेर आएको पैसाबाट आफुहरुले लिनुपर्ने रकम लिई बाँकी रकम लक्ष्मीलाई वासको व्यवस्थापन गर्नका लागि दिन सहमत भएका हुन । मंगलबार सिन्धुलीमाढीमा जनप्रतिनिधि, पत्रकार, नागरिक समाजका अगुवाहरु, महिला अधिकारकर्मीहरु, स्थानीयहरुको रोहबरमा विपक्षीहरु कनपा ६ धुरा बजार बस्ने महेश भुषाल (उनकी श्रीमति मनमाया), कनपा ६ पानीट्यांकीकी धनकुमारी प्रधान, कनपा ७ बर्देउटारकी चुडा कुमारी गौतम र मुद्दा कार्यान्वयन गर्ने क्रममा घरबाट निकालिएकी लक्ष्मी गुरुङका बीच छलफल गरिएको थियो ।
मंगलबार नै अदालतको फैसला बमोजिम विपक्षीका नाममा गएको जग्गा विक्री भएको छ । ५५ लाखमा उक्त जग्गा विक्री भईसकेको र एक महिनाभित्र सबै पैसा फस्र्यौट गरि बाँकी पैसा लक्ष्मीलाई वासको व्यवस्था गर्न दिईने भएको हो । २१ धुर जग्गा र काठको घर कनपा ६ पानीट्यांकी बस्ने धनराज गुरुङले किनेका छन । विपक्षी ३ जनालाई हालसम्मको व्याज सहित ४३ लाख रकम दिई बाँकी १२ लाख रुपैंया लक्ष्मीलाई उपलब्ध गराउने सहमति भएको छ ।
पटक पटक गरेर ३ जनाबाट लक्ष्मीले ११ लाख ४० हजार ऋण लिएकी थिईन । ऋण लिए पछि सो रकम तिर्न नसकेको भन्दै विपक्षीले २२ लाखमा लक्ष्मीको घरजग्गा दृष्टिबन्धक पास गरि अदालतमा मुद्दा पेश गरेका थिए । विपक्षीले २०७३ सालमा मुद्दा जितेका थिए । अदालतबाट मुद्दा जित्ने बेलामा लक्ष्मीको २ कित्ता गरि २१ धुर जग्गा र काठको घरको ३५ लाख मुल्यांकन गरिएको थियो । सो रकमको साँवा व्याज तथा अदालती प्रक्रिया र जग्गाको दाखा गर्दा तिर्नु पर्ने लाभकर सहितको रकम र वैंक व्याज समेत हिसाव गरी ऋणको साँवा व्याज लिएर बाँकी रकम गुरुङलाई दिन विपक्षीहरु तयार भएका हुन ।
अदालतले फैसला गरे बमोजिम लक्ष्मीको जग्गा २०७३ सालमा मनमाया, धनकुमारी र चुडाकुमारीको नाममा पास भएको थियो । उनीहरुले लक्ष्मीले घर नछोडेपछि भोग चलनका लागि अदालतमा मुद्दा दायर गरेका थिए । अदालतले शुक्रबार घर खाली गरि लक्ष्मीका सबै सामान उठाएर अदालतमा ल्याएको थियो । यस्तै आईतबार लक्ष्मीले पालेका कुखुरा समेत अदालतले लिलाम गरेको छ ।
घरबाट निकालिएपछि लक्ष्मी सडकमा आएकी थिईन । शुक्रबार राती अदालतको गेट अगाडीको चौताराबाट लक्ष्मीलाई मानवअधिकारकर्मी र पत्रकारले उद्धार गरि सेफ हाउसमा राखेका थिए । आइतबार साँझ उनी आफैंले अदालतले लगाएको ताल्चा तोडी खाली घरमा बसेकी थिईन । लक्ष्मीले अव पाउने १२ लाखबाट जिविकोपार्जन गर्ने छिन् ।
आफुहरु पनि समाजको अंग भएका कारण समाजले भनेको मानेर कानुनी रुपमा आफुहरु माथि भए पनि सामाजिक निर्णयलाई मान्न तयार भएको विपक्षी मध्येका महेश भुसालले बताए । ‘हाम्रो रकम पाउने गरी उहाँलाई पनि जीविका चलाउन पाउने अवस्था सृजना गर्नु पर्ने समाजको कुरालाई हामीले आत्मसाथ ग¥यौं’, भुसालले भने ।
