सिन्धुली । नेकपा एमालेका स्थायी कमिटी सदस्य डा. विन्दा पाण्डेले लैंगिक हिंसा विरुद्धको अभियानको अगुवाई सबै राजनीतिक दलहरुले गर्नुपर्ने बताएकी छिन । सोमबार सिन्धुलीका महिला नेताहरुलाई प्रशिक्षण दिदैं उनले अब राजनीतिक दलका नेतृत्वले लैंगिक हिंसा विरुद्धको अभियानमा ऐक्यवद्धता जनाएर मात्र नहुने र नेतृत्व नै गर्नुपर्ने बताएकी हुन ।
अखिल नेपाल महिला संघ सिन्धुलीले सिन्धुलीमाढीमा आयोजना गरेको प्रशिक्षण तथा भेलालाई सम्बोधन गर्दै उनले अनेमसंघ जस्ता महिला संगठन र पीडित पक्ष (महिला अभियानकर्ता) ले मात्र अभियान चलाएर लैैंगिक हिंसा अन्त्य गर्न सम्भव नभएको बताएकी हुन ।
अनेमसंघको मुख्य मुद्दा संविधानको धारा ३८ मा उल्लेख गरिएको अंश, वंश, समान सहभागिता र महिला हिंसा विरुद्धको हकलाई कार्यान्वयन गर्न अनेमसंघ अग्रपंक्तिमा आउन आग्रह गरेकी छिन । डा. पाण्डेले एमालेले ३३ प्रतिशत सहभागिता पार्टीको विधानमा सुनिश्चित गरे पनि संविधानले सुनिश्चित गरेको समानुपातिक सहभागिता सुनिश्चित गर्न अनेमसंघले नेतृत्व गर्नुपर्नेमा जोड दिईन । राजनीतिक दलहरुले नेतृत्व गर्दा अभियान प्रभावकारी हुने र महिला, विद्यार्थी, युवा, मजदुर, किसान, पेशाकर्मी लगाएत सबैको अभियान बन्ने भएकाले हिंसा अन्त्य सम्भव हुने पाण्डेले बताईन ।
उनले एमालेको विधानमा लेखेको ३३ प्रतिशत महिला सहभागिता पदाधिकारीमा समेत रहेकाले महिलाहरुले नेतृत्व लिन तयार हुन आग्रह गरेकी हुन । उनले प्रश्न र जवाफसँगै राखेर आन्तरिक प्रतिस्पर्धामा जान महिलाहरुलाई आग्रह गरिन ।
अनेमसंघका महिलाहरुलाई राजनीतिक प्रशिक्षण दिन सिन्धुली आएकी पाण्डेले नागरिकको मन र मत जित्ने नेताका रुपमा आफुलाई स्थापित गर्न महिलाहरुलाई आग्रह गरिन । उनले दक्षता, योग्यता, समय लगाव सबै गुण भएका नेताका रुपमा आफुलाई विकास गर्न र जुनसुकै नेतृत्व लिन सक्ने आँटको विकास गर्न पनि आग्रह गरिन ।
उनले महिलामा पनि युवा र सक्षम महिलालाई नेतृत्वमा अगाडि बढाउन पार्टी नेतृत्वलाई आग्रह गरिन ।
कार्यक्रममा बोल्दै नेकपा एमालेका प्रदेश सदस्य मञ्जु देवकोटाले महिलाका मुद्दा स्थापित गर्न अनेमसंघले नेतृत्व लिन आग्रह गरिन ।
यस्तै कार्यक्रममा बोल्दै नेकपा एमालेका जिल्ला अध्यक्ष प्रदीप कटुवालले महिला सहभागिताको लागि पार्टी संवेदनशिल रहेको बताए । उनले पार्टीको जिल्ला नेतृत्व चयन गर्दा सामाजिक, लैंगिक समावेशीकरणलाई प्राथमिकता दिईने बताए ।
अनेमसंघ सिन्धुलीका अध्यक्ष पार्वती सुनुवारको अध्यक्षतामा भएको कार्यक्रममा अनेमसंघ सचिवालय सदस्य रश्मिला देवकोटा, नेकपा एमालेका उपसचिव महेन्द्रदेव श्रेष्ठ, अनेमसंघका केन्द्रीय सदस्य सुकुमाया तामाङ लगाएतले मन्तव्य व्यक्त गरेका थिए ।
