सिन्धुली । जिल्लामा निशेधाज्ञा थप खुकुलो बनाईएको छ । सोमबार बसेको जिल्ला कोभिड व्यवस्थापन समितिको बैठकको सिफारिस अनुसार जिल्ला सुरक्षा समितिले निशेधाज्ञालाई थप खुकुलो बनाउने निर्णय गरेको छ । बैठकले असार १४ गतेसम्मका लागि निशेधाज्ञा थप गरेको भए पनि खुकुलो बनाउँदै लगेको छ । 
जिल्लामा तरकारी, फलफूल, दुध लगाएतका पसलहरु नियमित खुलेकोमा अब अन्य पसल पनि दिउँसो ३ बजेसम्म खुल्ने भएको छ । जिल्लाका बजारहरु विहान ६ बजेदेखि दिउँसो ३ बजेसम्म खुल्ने भएका हुन । एक हप्तादेखि ७ घण्टा खुल्दै आएका पसल अब १० घण्टा खुल्ने बनाईएको हो ।
यसरी ३ बजेसम्म खुल्ने पसलमा स्टेशनरी, कपडा, सुनचाँदी पसल, टेलरिङ, जुत्ता चप्पल पसल र निर्माण सामग्रीका पसल ३ बजेसम्म खोल्ने निर्णय भएको प्रमुख जिल्ला अधिकारी सुरेश न्यौपानेले जनाएका छन । एक हप्ता अघि १२ बजेसम्म पसल खोल्न पाउने व्यवस्था गरिएको छ ।
न्यौपानेले सार्वजनिक सूचना जारी गरि सैलुन, व्युटिपार्लर, जिमखाना, फुटपाथ पसल, शैक्षिक संस्था, ट्युसन सेन्टर र पार्टी प्यालेस नखुल्ने जनाएका छन । तथापी केहि व्युटिपार्लर, फुटपाथ पसलहरु, कस्मेटिक पसलहरु, मोवाईल पसलहरु यसअघि नै खुलिरहेका छन ।
कोरोना संक्रमणको दर घटेको र निको हुने दर बढेसँगै जिल्लाको लकडाउन थप खुकुलो बनाउँदै लगिएको जिल्ला प्रशासन कार्यालय सिन्धुलीले जनाएको छ ।
यस्तै मंगलबारदेखि सार्वजनिक सवारी साधन बाहेक सबै सवारी साधन खुल्ला गरिएको छ । नीजि सवारी साधन खुल्ला नगरे पनि चलिरहेका थिए । मंगलबारदेखि जिल्लाका सबै सरकारी कार्यालयहरु स्वास्थ्य सुरक्षाका मापदण्ड पालना गरि खुल्ला गरिने भएको छ ।
