सिन्धुली । मालपोत कार्यालय सिन्धुलीले लामो समयदेखि बन्द रहेको सेवा मंगलबारदेखि सुचारु गर्ने भएको छ । कार्यालयले प्रदान गर्ने सेवा स्वास्थ्यका मापदण्ड पालना गर्दै स्थानीय तह अनुसार आलो पालो सेवा दिन थालिएको कार्यालयले जनाएको छ ।
बैशाख २२ गतेदेखि सेवा प्रवाह गर्न बन्द गरेको कार्यालयबाट स्थानीय तह अनुसार सेवा प्रवाह गर्ने भएको मालपोत कार्यालयका सूचना अधिकारी पुरुषोत्तम दाहालले बताए ।
कार्यालयबाट आईतवार, सोमवार दुधौली नगरपालिका, तीनपाटन गाउँपालिका र फिक्कल गाउँपालिकाका सेवाग्राहीलाई सेवा दिईने भएको छ भने मंगलबार, बुधवार मरिण गाउँपालिका, हरिहरपुरगढी गाउँपालिका र सुनकोशी गाउँपालिकाका सेवाग्राहीलाई सेवा दिईने भएको छ ।
यस्तै बिहिवार, शुक्रबार कमलामाई नगरपालिका, घ्याङ्लेख गाउँपालिका र गोलन्जोर गाउँपालिकाका सेवाग्राहीलाई सेवा दिईने भएको छ ।
स्वास्थ्यका मापदण्ड पालना गर्दै सेवा प्रवाह गरिने र भिडभाड नहोस भनेर आलोपालो सिस्टममा सेवा प्रवाह गर्न लागिएको दाहालले बताएका छन । घरजग्गा कारोबार, बैंक तथा वित्तिय संस्थाबाट राखिने दृष्टिबन्धक रोक्का सम्बन्धि काम लामो समयदेखि अवरुद्ध हुदा सेवाग्राही समस्यामा परेकाले आलोपालो सेवा दिन सुरु गरेको दाहालले बताए ।
