सिन्धुली । विपी राजमार्गमा मापदण्ड विपरितका सवारी साधन रातको समयमा चल्ने गरेका छन् । जिल्ला प्रहरी कार्यालय सिन्धुलीको मिलेमतोमा पैसा लिएर यस्ता सवारी साधन चलाइने गरेको हो । विपी राजमार्गमा ६ चक्के मालवाहक ट्रकहरु मात्र चल्न पाउने भएपनि प्रती ट्रक ६ चक्केको ५ हजार र १० चक्केको १५ हजारसम्म पैसा लिई राती १२ बजेपछि पठाउने गरिएको छ ।
जिल्ला प्रहरी कार्यालय सिन्धुलीको प्रमुख भएर आएका प्रहरी उपरिक्षक रामेश्वर प्रसाद यादवको ठाडोे निर्देशनमा यसरी नियम विपरित मालवाहक सवारी साधनहरु चलाइएको हो । सुरुमा रुट पर्मिटको कारण देखाउँदै गाडीहरु रोकेका यादवले आर्थिक कारोवारको कुरा मिलेपछि यसरी ट्रकहरु छाड्ने गरेका हुन् ।
विपी राजमार्ग दिनप्रतिदिन तस्करीको नाका बन्दै गएको स्थानीयको गुनासो छ । तराईका विभिन्न खुला सीमानाबाट नेपाल भित्रिने अवैध भन्सार छलिका सामानहरु यसरी नै रातको समयमा रामेछाप, दोलखा तथा काठमाडौँ लगायतका स्थानमा पठाइने गरेको छ । यसैगरी रातको समयमा भारतीय नम्बर प्लेटका साना गाडीहरु ठूलो संख्यामा यो बाटो हुँदै जाने गरेको र त्यसमा के ओसारिन्छ र किन कुद्छन् खनियाखर्कका स्थानीयहरु प्रश्न गर्छन् ।
सर्लाहीका व्यापारी दिनेश यादवको सेटिङमा अवैध सामानहरु जाने गरेको प्रहरीकै एक कार्यरत अधिकृतले नाम नबताउने शर्तमा जानकारी दिए । सिन्धुली जिल्लाका विपी राजमार्गमा पर्ने प्रहरी इकाइहरुमा समेत आफू अनुकुका इन्चार्ज राखी प्रती इकाई दैनिक रकम बुझाउन मापदण्ड नै तोकेको ती अधिकृतले दावी गरे । उनका अनुसार नेपालथोक, रातमाटा तथा खुर्कोटका प्रहरी इकाईले दैनिक दश हजारसम्म रकम उठाएर प्रहरी उपरिक्षक यादवलाई बुझाउने गरेका छन् ।
हरेक दिन साँझको समयमा तराईबाट आएका ट्रकहरु बुका पुल आसपासमा राखिन्छ र राती ती ट्रकहरु पठाउने गरिन्छ । विपी राजमार्गबाट अवैध सामान कटाउन सजिलो भएपछि नेपालगञ्ज, भैरहवा, वीरगन्ज तथा पूर्वका काकडभित्ता सम्मका व्यापारीले यो नाका प्रयोग गर्दै अवैध सामान ओसारपसार गर्ने गरेका छन् ।
त्यसैगरी जिल्लाबाट निकासी हुने काठका ट्रकहरुसँग समेत प्रति ट्रक ५ हजार लिने गरेको खुलासा भएको छ । एक काष्ठ व्यावायीका अनुसार एस्पी यादव आएपछि प्रति ट्रक ५हजार तिनुपर्ने बाध्यता छ, नदिए काठ झारेर चेक गर्नुपर्छ भन्छन् । “राजस्व तिरेर नियमसँगत ल्याएको भएपनि लोड, अनलोय गर्नुपर्ने झण्झट तथा खर्चका कारण ५ हजार तिर्न बाध्य छौँ” उनले भने । जसका लागि असई विटु सिं लाई जिम्मा दिएको समेत खुल्न आएको छ ।
जिल्ला प्रहरी कार्यालय सिन्धुलीका प्रहरी उपरिक्षक रामेश्वर प्रसाद यादवलाई विपी राजमार्गमा नियमविपरित सवारी चल्ने गरेको सन्दर्भमा पत्रकारहरुले जिज्ञासा राख्दा सधेँ एउटै उत्तर दिने गरेका छन् । “सम्बन्धीत निकायको अनुमति लिएर आएका हाइड्रोपावर र अत्यावश्यक निर्माण सामाग्री मात्र पठाएका छौँ अन्यथा आरोपमा कुनै सत्यता छैन । हामीले कसैँसँग पैसा लिएर गाडी पठाएका छैनौँ” यादवको दावी छ ।
