सिन्धुली । महान्यायाधिवक्ताको कार्यालयले नागरिकता अध्यादेशबारे अनर्गल प्रचार गरेको बताएको छ । कार्यालयले सोमबार पत्रकार सम्मलेन गर्दै समाजमा भ्रम फैलाउने तत्वहरु सक्रिय रहेको जनाएको छ । नागरिकता अध्यादेशबारे प्रष्ट पार्न गरिएको पत्रकार सम्मेलनमा महान्यायाधिवक्ता कार्यालयका सहन्यायाधिवक्ता सञ्जीवराज रेग्मीले भने ‘नागरिकता अध्यादेशबारे अर्नगल प्रचार गरियो ।
संविधानमा भएको व्यवस्था कायान्वयन गर्न र सर्वोच्च अदालतले विभिन्न मुद्दाहरुमा दिएको आदेश कार्यान्वयन गर्नका निम्ति यो अध्यादेश ल्याईएको हो ।’
उनले संविधानको व्यवस्था अनुसार जन्मको आधारमा नेपाली नागरिकता पाएका व्यक्तिको सन्तानलाई वंशजको नागरिकता दिने गरी नागरिकता अध्यादेश जारी गरिएको बताए ।
पत्रकार सम्मेलनमा गृह मन्त्रालयका सचिव महेश्वर न्यौपानेले संसदबाट नागरिकता विधेयक पारित हुन नसकेका कारण अध्यादेश ल्याउनु परेको बताए । उनले संसदमा उचित समयमा विधेयक पेश गरे पनि लामो समयसम्म टुंगो लाग्न नसक्दा अध्यादेश ल्याउनु परेको बताए । मन्त्रिपरिषद्को सिफारिसमा राष्ट्रपति विद्यादेवी भण्डारीले आइतबार नागरिकता अध्यादेश जारी गरेकी थिइन् ।
