सिन्धुली । नेपाल सरकारले छैटौं राष्ट्रिय पत्रकारीता दिवसका अवसरमा सिन्धुलीका वरिष्ठ पत्रकार शेषराज दाहाल र सिन्धुली घर भई सञ्चारिका समूहको अध्यक्ष भईसकेकी पत्रकार नितु पण्डितलाई राष्ट्रिय पत्रकारीता पुरस्कारका लागि छनौट गरेको छ । सञ्चार तथा सूचना प्रविधि मन्त्री पार्वत गुरुङले दाहाल र पण्डित सहित १२ जनालाई यो पुरस्कारबाट सम्मानित गर्न लागेको घोषणा गरेका हुन ।
दाहाल सिन्धुलीमा पत्रकारिताको सुरुवात गर्ने पहिलो व्यक्ति हुन । उनले जिल्लाको पहिलो पत्रिका सिन्धुल साप्ताहिक औपचारिक रुपमा जिल्लामा दर्ता गरि २०४८ सालमा जिल्लामा पत्रकारीता सुरु गरेका थिए । उनी प्रेस चौतारी नेपाल, नेपाल पत्रकार महासंघ लगाएतका संस्थाका संस्थापक अध्यक्ष समेत हुन । हालसम्म पनि उनी निरन्तर पत्रकारीतामा क्रियाशिल छन । यस्तै पण्डित सिन्धुली घर भई काठमान्डौलाई कर्मथलो बनाई पत्रकारीता गर्दै आएकी छिन । दाहाल र पण्डित सहित जनही एकलाख राशी सहितको उक्त पुरस्कार पाउनेमा तीन जना महिला सहित १२ जना रहेका छन । यसरी सम्मानित हुनेमा उजिर मगर, मातृका पौडेल, संगिता खड्का, पुनम पौडेल, हेमन्त विक, शितल शाह, दिलिप थापा, दिपेन न्यौपाने, दुर्गा प्रसाद शर्मा, सुरोजंग पाण्डे रहेका छन । यस्तै सरकारले चारजना वरिष्ठ पत्रकारहरुलाई वरिष्ठ पत्रकारीता पुरस्कार दिने भएको छ ।
जनही २ लाख राशि सहितको वरिष्ठ पत्रकारीता पुरस्कार पाउनेमा अग्नी शिखा (मरणोपरान्त), हर्ष सुब्बा, रघु मैनाली र शार्दुल भट्टराई रहेका छन ।
उक्त पुरस्कार कोभिड १९ संक्रमणका कारण दिवसका अवसरमा वितरण गर्न नसकिएको र अनुकुलता हेरि राष्ट्रपतिबाट प्रदान गरिने मन्त्री गुरुङले बताएका छन ।
छैटौँ राष्ट्रिय पत्रकारिता दिवस, नेपालको पहिलो छापा पत्रिका गोरखापत्र दैनिकको १ सय २१ औंँ वर्ष प्रवेश तथा गोरखापत्र संस्थानको ५९ औंँ वार्षिकोत्सवका अवसरमा आज जारी शुभकामना दिँदै मन्त्री गुरुङले जनतालाई सही सूचना दिने तथा शान्ति, समृद्धि र विकासका माध्यमबाट नेपालीलाई सुखी राख्ने काममा आमसञ्चार क्षेत्रलाई उत्प्रेरकको भूमिका निर्वाह गर्न आग्रह गरेका छन् ।
उनले नेपालको लोकतान्त्रिक आन्दोलन, नागरिक अधिकार प्राप्तिको आन्दोलनदेखि संघीय लोकतान्त्रिक गणतन्त्र स्थापनाका लागि नेपालको आमसञ्चार जगतले उल्लेख्य भूमिका खेलेको बताउँदै संविधानमा उल्लखित पूर्ण प्रेस स्वतन्त्रता, विचार तथा अभिव्यक्ति स्वतन्त्रता, सूचना तथा सञ्चारको हक लगायत सूचना र आमसञ्चारसँग सम्बन्धित सबै व्यवस्थाको कार्यान्वयन गर्न वर्तमान सरकार प्रतिबद्ध रहेको बताए । उनले आगामी बजेटमा सरकारले सञ्चार क्षेत्रलाई उचित सम्बोधन गर्ने समेत प्रतिवद्धता जनाए ।
