सिन्धुली । कमलामाई नगरपालिकाले १११ औं अन्तर्राष्ट्रिय श्रमिक महिला दिवस को अवसरमा १४ जना एकल तथा अतिविपन्न महिलालाई सम्मान गरेको छ । उनीहरुलाई व्यवसाय प्रवद्र्धनका लागि २० हजार नगद अनुदान सहित उनीहरुलाई कदर पत्रले सम्मान गरिएको हो ।
वडा समितिले छानेका व्यवसाय गरिरहेका र आर्थिक हिसावले अतिविपन्न महिलालाई सम्मान गरिएको हो । कमलामाई नगरपालिका वडा नं. २ मा नगरपालिकाका मेयर खड्ग खत्री, कमलामाई नगरपालिका ५ मा नेकपा एमालेका केन्द्रीय सदस्य उमा कोइराला, वडा नं. ९ मा कमलामाई नगरपालिकाका उपमेयर मञ्जु देवकोटा लगाएतले ती महिलाहरुलाई सम्मान गरे ।
कमलामाई नगरपालिकाले सबै वडामा वडा कार्यालयको आयोजनामा विभिन्न कार्यक्रम गरि महिला दिवस मनाएका हुन । ती वडामा स्थानीय संघसंस्था, समूह, सहकारीहरु, किशोरी समूह, बालक्लव लगाएतसँगको सहकार्यमा कार्यक्रमहरु गरिएको कमलामाई नगरपालिका सिन्धुलीले जनाएको छ ।
यसैबीच कमलामाई नगरपालिकाले हिंसा पीडित, एकल महिला तथा कालिका फाईवर झोला उद्योगकी सञ्चालक सृजना श्रेष्ठलाई सम्मान गरेको छ । वडा कार्यालयको आयोजनामा कालीमाई मन्दिरमा गरिएको छलफल कार्यक्रममा उनलाई सम्मान गरिएको हो ।
वडा अध्यक्ष पूर्ण बहादुर खड्काको अध्यक्षता तथा नेकपा एमालेका केन्द्रीय सदस्य उमा कोइरालाको प्रमुख आतिथ्यतामा भएको कार्यक्रममा अन्तरपार्टी महिला सञ्जालका अध्यक्ष सविता कोइराला, महिला नेतृहरु शान्ता पाख्रिन, नेपाल पत्रकार महासंघ सिन्धुलीका उपाध्यक्ष बिमला पाण्डे, जिल्ला महिला उद्यमी संघ सिन्धुलीका सचिव विमला काफ्ले, वडा नं. ५ का वडा सदस्यहरु, टोल विकास संस्था तथा विभिन्न संघसंस्थाका प्रतिनिधिहरुको सहभागिता रहेको थियो ।
कार्यक्रममा बोल्दै नेकपा एमालेका केन्द्रीय सदस्य उमा कोइरालाले समानताको आन्दोलनमा लाग्न आर्थिक उपार्जनमा लाग्न महिलाहरुलाई आग्रह गरिन । उनले महिलाहरुले आर्थिक सामाजिक सांस्कृति अधिकार प्राप्तीका लागि गरिएको आन्दोलनको स्मरण गर्दै महिलाहरुलाई आर्थिक उपार्जनमा लगाउन र रोजगारी सृजना गर्न आवश्यक रहेको बताईन ।
कार्यक्रममा बोल्दै अन्तर्पार्टी महिला संञ्जालका अध्यक्ष सविता कोइरालाले घरेलु कामको जबसम्म मुल्यांकन हुदैन महिलाहरुमाथि हिंसा भइरहने बताईन ।
कार्यक्रममा बोल्दै नेपाल पत्रकार महासंघ सिन्धुलीका उपाध्यक्ष बिमला पाण्डेले महिलाहरुले घरेलु कामलाई श्रम र रोजगारीका रुपमा आफै स्वीकार गरि मुल्य निर्धारणका लागि एकतावद्ध हुन आवश्यक रहेको बताईन । उनले महिला पत्रकारहरुले राष्ट्रिय तथा अन्तर्राष्ट्रिय रुपमा महिला आन्दोलनको नेतृत्व गरेको स्मरण गरिन । उनले समान कामका लागि समान ज्याला, समानताका आन्दोलन, महिलाको पहिचानका आन्दोलनको नेतृत्व महिला पत्रकारले नेतृत्व गरेका भए पनि उनीहरु पत्रकार थिए भनेर उच्चारण नगरिएको बताईन ।
क्यालराजेट्किन देखि नेपालका साधना प्रधान, कामाक्षदेवी लगाएतका नेतृहरु पत्रकार रहेको स्मरण समेत गराईन । पाण्डेले पछिल्ला महिला आन्दोलनको अगुवा महिला पत्रकारहरु रहेको पनि उल्लेख गरिन । महिला अधिकारका आन्दोलनमा कलम र आवाजका माध्यमबाट पत्रकार महिलाले योगदान दिईरहेको पनि स्मरण गरिन । कार्यक्रममा वडा सचिव उज्जल थापाले स्वागत गरेका थिए भने कार्यक्रमको सहजीकरण सावित्रा रेग्मीले गरेकी थिईन ।
