सिन्धुली । नेपाल कम्युनिष्ट पार्टी निकट अखिल नेपाल महिला संघ (अनेमसंघ) का केन्द्रीय सचिव सुजिता शाक्यले राष्ट्रपति विद्यादेवी भण्डारी र अन्य महिला नेतृत्वमाथि पछिल्लो समय नेकपाका नेताहरुबाट गरिएको चारित्रीक अपमानलाई नेपाली सभ्यता, संस्कार र खराव प्रवृति भनेकी छिन । उनले राजनीतिक दलका कार्यक्रममा महिला नेताहरुमाथि अपमान गर्ने व्यक्तिहरु असभ्य रहेको बताएकी हुन । बुधबार अखिल नेपाल महिला संघ (अनेमसंघ) सिन्धुलीको विस्तारित बैठकलाई सम्बोधन गर्दै उनले यस्तो बताएकी हुन ।
नेकपा केन्द्रीय सदस्य समेत रहेकी शाक्यले महिलाको सार्वजनिक रुपमा चरित्रहत्या र अपमान गर्ने व्यक्तिको नाम लिदा पनि अपमान हुने बताएकी छिन । उनले महिलालाई अपमान गर्नेलाई सामाजिक रुपमै वहिस्कार गर्न समेत नेपाली महिलाहरुलाई आग्रह गरेकी छिन ।
उनले महिलालाई अपमान गर्ने खराव प्रवृति र संस्कार विरुद्ध जुट्न समेत आग्रह गरिन । मार्च ८ अर्थात १११ औं अन्तर्राष्ट्रिय श्रमिक महिला दिवसको पूर्वसन्ध्यामा गरिएको उक्त कार्यक्रमलाई सम्बोधन गर्दै शाक्यले महिलाको सम्मान र अधिकारका खातिर अनेमसंघले २००८ सालदेखि नै संगठित रुपमा लड्दै आएको स्मरण गरिन । उनले महिला हिंसा, अपमान, बलत्कार रहित देश भएको हेर्न नेपाली महिलाहरुले चाहेको बताउँदै महिला अधिकार स्थापना केपी ओलीको नेतृत्वको सरकारबाट मात्र सम्भव रहेको बताईन ।
कार्यक्रममा बोल्दै नेकपाका केन्द्रीय सदस्य एवम संविधानसभा सदस्य विषमलाल अधिकारी दनुवारले महिलाहरुले नेपालका ठूला ठूला आन्दोलनको नेतृत्व नेपाली महिलाहरुले गरेको स्मरण गर्दै नेकपा विभाजनको बेला सरकारलाई सहयोग गर्न समेत नेपाली महिलाहरु एकतावद्ध हुने विश्वास व्यक्त गरे । उनले पार्टी र सरकार गम्भिर संकटमा परेका बेला नेपाली महिलाहरुले सहयोग गर्नेमा विश्वास व्यक्त गरे ।
कार्यक्रममा बोल्दै नेकपाका केन्द्रीय सदस्य तथा जिल्ला सहइन्चार्ज उमा कोइरालाले महिला र पुरुषका बीचमा पनि वर्ग संघर्ष कायम रहेको बताईन । उनले महिलाहरुको पारिवारीक, सामाजिक दायित्वलाई मुद्दा बनाएर राजनीतिमा अवरोध नगर्नका लागि राजनीतिक नेतृत्वलाई आग्रह गरेकी छिन । उनले महिलाहरुले हरेक संकटमा साथ दिदै आएको बताउँदै अबको नेतृत्व महिलामैत्री बन्नेमा विश्वास गरिन ।
यस्तै कार्यक्रममा बोल्दै अनेमसंघका केन्द्रीय सदस्य एवम् वाग्मति प्रदेश सचिव सरस्वति बस्नेतले महिलाहरुलाई टोल टोलसम्म संगठित हुन र केपी ओली नेतृत्वको सरकारलाई सहयोग पु¥याउन आग्रह गरिन ।
कार्यक्रममा बोल्दै अनेमसंघका केन्द्रीय सदस्य एवम युवा महिला समितिका संयोजक दिपा शर्माले युवा महिलालाई नेतृत्वमा ल्याउने र उनीहरुमा नेतृत्वको क्षमता विकास गर्ने उद्देश्यका साथ युवा महिला समिति निर्माणमा लागेको बताइन ।
अनेमसंघ सिन्धुलीका अध्यक्ष पार्वति सुनुवारको अध्यक्षतामा भएको कार्यक्रममा नेकपा सिन्धुलीका अध्यक्ष प्रदीप कटुवाल, नेकपाका कार्यालय सदस्य महेन्द्रदेव श्रेष्ठ, अनेमसंघका केन्द्रीय सदस्य एवम जिल्ला इन्चार्ज रश्मिला देवकोटा, अनेमसंघ केन्द्रीय सदस्य कमला पोखरेल, अनेमसंघ केन्द्रीय सदस्य सुकुमाया तामाङ, कमलामाई नगरपालिकाका उपमेयर मञ्जु देवकोटा, दुधौली नगरपालिकाका उपमेयर बालकुमारी दनुवार, तिनपाटन गाउँपालिकाका उपप्रमुख पदममाया तामाङ लगाएतले मन्तव्य व्यक्त गरेका थिए । कार्यक्रममा अनेमसंघ सिन्धुलीका सदस्य रमा कार्कीले स्वागत गरेकी थिइन भने जिल्ला सचिव पार्वती भट्टराईले कार्यक्रमको सहजीकरण गरेकी थिइन ।
