कोभिड १९ अस्पतालमा एक सातामा पाँच वेडको आईसियु र भेन्टिलेटर पनि सुरु हुने भएको छ भने पचास वेडको आईसोलेसनमा अक्सिजन प्लान्ट जडानका लागि काम सुरु भएको छ ।
सिन्धुली । सिन्धुलीमा शनिबारदेखि आरटिपिसिआर विधिबाट कोभिड १९ अर्थात कोरोना परिक्षण सुरु भएको छ । बाग्मति प्रदेश सरकारले पिसिआर मेसिन उपलब्ध गराएपछि त्यसको जडान सँगै कोरोना परिक्षण सुरु भएको बाग्मति प्रादेशिक प्रयोगशाला धुलिखेलका ल्याव निर्देशक नारायण कार्कीले बताएका छन ।
सिन्धुली अस्पतालको मातहतमा रहने गरि कमलामाई नगरपालिका वडा नं. ६ शिवनगरमा उक्त मेसिन जडान गरि ल्याव सञ्चालनमा ल्याईएको हो । बाग्मति प्रदेश सरकारको करीव एक करोड २५ लाखको लागत र सिन्धुली अस्पतालको १५ लाख बराबरको व्यवस्थापन खर्चमा उक्त ल्याव सञ्चालनमा ल्याईएको हो ।
शनिबार बाग्मति प्रादेशिक प्रयोगशाला धुलिखेलका निर्देशक कार्की सहित ३ जनाको प्राविधिक टोलीले मेसिन जडानपछि स्याम्पल परिक्षण गरेका छन । परिक्षणका लागि २० जनाको नमुना जाँच गरि सफल भएको कार्कीले बताए ।
पहिले परिक्षण गरि रिपोर्ट आएका स्याम्पललाई पुनः परिक्षण गर्दा पहिलेकै नतिजा आएपछि प्रयोगशाला पूर्ण रुपमा सञ्चालमा आएको कार्कीले जनाएका छन । उनका अनुसार आइतबारदेखि सिन्धुलीमा नियमित आरटिपिसिआर विधिबाट कोरोना परिक्षण गर्न सकिने भएको छ । सिन्धुली अस्पताल विकास समितिका अध्यक्ष प्रलाद पोखरेलका अनुसार कोभिड १९ परिक्षण प्रयोगशाला सञ्चालनका लागि ९ जना स्वास्थ्यकर्मीको व्यवस्था गरेको छ । नवनिर्मित कोभिड १९ अस्पतालसँगै जोडिएको भवनमा उक्त मेसिन जडान गरिएको छ ।
स्वास्थ्यकर्मीलाई आवासको व्यवस्था सहित ल्याव सञ्चालन गर्न थालिएको छ । बाग्मति प्रादेशिक प्रयोगशाला धुलिखेलबाट आएको स्वास्थ्यकर्मीहरुको टोलीले ल्यावलाई व्यवस्थित र ल्यावमा काम गर्ने स्वास्थ्यकर्मीलाई परिक्षण बारेमा तालिम दिई दक्ष बनाएर फर्कने भएको कार्कीले बताए ।
जिल्लामा पिसिआर मेसिन नहुँदा आवश्यक परेका विरामीलाई समेत परिक्षण गर्न सक्ने अवस्था थिएन । उनीहरुको स्वाव संकलन गरि हेटौडा, धुलिखेल वा काठमान्डौ पठाउनुपर्ने अवस्था रहेको थियो ।
यसैबीच कोभिड १९ अस्पतालमा ३ वेडको आईसियु र २ बेडको भेन्टिलेटर जडान हुने भएको छ । सामान सबै सिन्धुली आईसकेकाले अबको एक सातामा भेन्टिलेटर र आइसियु समेत सञ्चालनमा ल्याईने सिन्धुली अस्पताल विकास समितिका अध्यक्ष पोखरेलले जानकारी दिए । यस्तै कोभिड अस्पतालको पचास वेडमा अक्सिजन प्लान्ट जडानका लागि काम सुरु भएको छ ।
