सिन्धुली । कोरोना महामारीकाबीच सामाजिक सद्भाव सहित अस्ताउँदो सूर्यलाई अर्ग दिएर सिन्धुलीका विभिन्न स्थानमा छठ मनाईएको छ । मधेशी समुदायले मनाउँदै आएको छठ सिन्धुलीमा पहाडी समुदायको समेत सहभागितामा मनाईएको छ ।
कमलामाई नगरपालिका वडा नं. ५ को कालीमाई मन्दिर मुनीको ग्वाङखोला र मधुटारको तल्लो टोल हाटबजार नजिक छठ मनाईएको छ ।
यस्तै कमलामाई नगरपालिका वडा नं. ६ को धुराबजार नजिक ग्वाङखोलामा पनि छठ मनाईएको छ ।
सामाजिक दुरी कायम गरि सिमित व्यक्तिको उपस्थितिमा छठ मनाईएको मधेशी समुदायका अगुवा कुन्दन चौधरीले बताए । उनका अनुसार हरेक वर्ष छठ पर्वमा पहाडी र मधेशी समुदायको सँगै सहभागिताले आपसी सद्भाव समेत बढ्ने गरेको बताए ।
उनका अनुसार सिन्धुलीमा बस्दै आएका र लामो समयदेखि तराई नझरेका मधेशी समुदायले सिन्धुलीका खोला किनारमा समूहमा छठ मनाउने गरेका छन भने पहाडी समुदायले समेत मधेशी समुदायसँगै मिलेर छठ पूजा गर्ने गरेका छन ।
पहाडी समूदायका नागरिकको उपस्थितिले आपसी सद्भाव बढाएको स्थानीय जनप्रतिनिधि गोमा प्रधानले बताएकी छिन । उनले छठ पर्व मनाउने पहाडी समूदाय पनि बढ्दै गएको बताईन ।
गत वर्षको तुलनामा यस वर्षको छठ भने फरक देखिएको छ । ठूला ठूला आवाजमा पटका पट्काउने, म्युजिक बजाउने भिडभाड गर्ने काम यसपटक भएको छैन । छठ स्थलमै स्वास्थ्यका मापदण्ड अपनाउन सचेत गर्ने गरि स्लोगन तथा सन्देशमूलक सामग्रीहरु समेत टाँसिएको छ ।
चौधरीका अनुसार परिवारै छठ स्थलमा बस्ने परम्परालाई यस वर्ष तोडिएको छ । परिवारको एकजनालाई मात्र छठपूजा स्थलमा बस्न दिईएको छ । शनिबार उदाउँदो सूर्यलाई अर्ग दिएर छठ पूजा समापन गरिने छ ।
