सिन्धुली । नगरभित्र कोभिड १९ संक्रमण बढ्न सक्ने खतरालाई मध्येनजर गरि दुधौली नगरपालिका सिन्धुलीले लकडाउनको घोषणा गरेको छ ।
अत्यावश्यक बाहेकका सबै सेवाहरु सहित नाका बन्द समेत गरेको नगरपालिकाले सूचना जारी गरि जानकारी गराएको छ । नगरपालिकाले साउन ३० गते राती १२ बजेदेखि भदौ ६ गते राती १२ बजेसम्मका लागि नाकाबन्दी सहित नगरपालिका लकडाउन गरेको हो ।
नगरपालिकाका मेयर घनश्याम राउतले नगरपालिकाले गरेको निर्णयलाई कार्यान्वयन गर्न अनुरोध समेत गरेका छन । राउतले नगरपालिका भित्र स्वास्थ्य संस्था र सुरक्षा निकायबाहेक सबै सेवा बन्द हुने जनाएका छन ।
यस्तै खाद्यान्न तरकारी फलफूल दुध पसलहरु विहान ६ देखि १० बजेसम्म खुल्ने छन । अत्यावश्यक बाहेकका सबै सवारी साधान बन्द हुने पनि नगरपालिकाले जनाएको छ । यस्तै नगरपालिकाभित्र सभा सम्मेलन तथा सार्वजनिक कार्यक्रम नगर्न पनि नगरपालिकाले अनुरोध गरेको छ ।
यस्तै दुधौली नगरपालिकाले नगर क्षेत्र भित्र प्रवेश गर्ने सबै नाका बन्द गरिएको जनाएको छ । वडा नं. ७ को सिमराह नाका, वडा नं. ३ को झुँगा नाका र मिलनचोक नाका, वडा नं. ९ को खोक्सा नाका, वडा नं. ६ को जगाडी नाका, दुधौली नगरपालिकाको ११ मा रहेको बेलसोत र गँरास नाका र वडा नं. ८ मा रहेको वटाहा नाका बन्द गरेको हो ।
ती नाकामा सुरक्षाकर्मीको व्यवस्था गरिएको समेत नगरपालिकाले जनाएको छ । यसैबीच नगरपालिकाले अत्यावश्यक काममा बाहिर निस्कदा मास्कको अनिवार्य प्रयोग गर्न समेत नगरवासीलाई अनुरोध गरेको छ ।
