सिन्धुली । सिन्धुली अस्पताललाई कोरोना अस्पतालका रुपमा प्रदेश सरकारले विकास गर्ने घोषणासँगै केन्द्रीय सरकाले अस्पतालमा आईसियु बनाउन आएको रकमले अस्पतालले आईसियु सञ्चालनको तयारी गरेको छ । तर आवश्यक जनशक्ति र आईसियु सञ्चालनका लागि लाग्ने अक्सिजन प्लान्ट निर्माण गर्न बजेटको कमी भएपछि आईसियु सञ्चालनमा आउन सकेको छैन ।
अस्पतालले जनाए अनुसार उक्त अस्पतालमा ३ वेडको आईसियु निर्माणका लागि स्वास्थ्य मन्त्रालयबाट १ करोड बजेट आएको थियो । उक्त बजेटबाट आईसियुमा आवश्यक वेड, इसिजी मेसिन, एक्सरे मेसिन, विरामी हेरचाह गर्ने मनिटर लगाएतका सामग्रीहरु खरिद भईसकेका छन भने अक्सिजन प्लान्टका लागि वाईरिङ लगाएतका काम भएका छन ।
अब अस्पतालमा आईसियुका लागि दक्ष जनशक्ति र अक्सिजन प्लान निर्माणका लागि रकम नहुदा समस्या भएको अस्पतालका मेडिकल सुपरिटेन्डेन लक्ष्मण खड्काले बताए । उनका अनुसार अक्सिजन प्लान्ट बनाउनका लागि सानोमा ५५ लाख देखि ठूलोमा एक करोडसम्म लगानी लाग्न सक्ने अनुमान गरिएको छ ।
मेडिकल सुपरिटेन्डेन खड्काले नयाँ जनशक्ति भर्ना गर्ने वा भईरहेको जनशक्तिलाई तालिम दिई दक्ष बनाउने भन्ने विषयमा छलफल चलिरहेको बताए । आईसियु सञ्चालनमा ल्याउन सके अति जोखिममा रहेका विरामीलाई बचाउन सहज हुने पनि उनले बताए ।
