सिन्धुली । सिन्धुली अस्पतालमा सुत्केरी हुने महिलाहरुलाई राख्नका लागि नयाँ भवन निर्माण गरिएको छ । ९ वटा वेड अटाउने गरि उक्त भवन निर्माण गरिएको हो । जसमा हाल ७ वटा वेड राखि सकिएको छ ।
दैनिक १० जनासम्म महिलाहरु सुत्केरी हुने उक्त अस्पतालमा वेडको अभाव भएपछि नयाँ भवन निर्माण गरिएको हो । २० दिनमा उक्त भवन निर्माण गरिएको छ । अस्पतालको प्रसुति कक्षमा अप्रेशन गरिने सुत्केरी महिलाहरुलाई राख्नका लागि उक्त भवन निर्माण सम्पन्न गरिएको हो ।
स्वास्थ्य मन्त्रालयको १३ लाख, उर्मिला थापाबाट प्राप्त रकम २ लाख, सामुदायिक वन उपभोक्ता महासंघ जिल्ला महासंघबाट प्राप्त १ लाख र विजय कुवरबाट प्राप्त २० हजार रकमबाट भवन निर्माण गरिएको सिन्धुली अस्पतालले जनाएको छ ।
भवन सम्पन्न गर्दा १६ लाख ३८ हजार रुपैंया भ्याट सहित लागत लागेको सिन्धुली अस्पताल विकास समितिका अध्यक्ष प्रलाद पोखरेलले बताए । उनले भोलीदेखि नवनिर्मित भवनबाट सुत्केरी महिलाले सेवा पाउने बताए । सुत्केरी महिलालाई राख्ने ठाउँ अभावका कारण जिल्ला बाहिरका अस्पतालमा पठाउनुपर्ने बाध्यता आएपछि भवन निर्माण गरिएको पोखरेलले बताए ।
उक्त भवनका लागि आवश्यक वेड तथा अन्य सामग्री, उपकरणहरु गरि १० लाख बराबरको सामान कमलामाई नगरपालिकाले सहयोग गरेको छ । भवनको औपचारिक रुपमा विहिबार उद्घाटन गरिएको छ ।
कमलामाई नगरपालिका सिन्धुलीका मेयर खड्ग खत्रीले औपचारिक रुपमा भवन उद्घाटन गरि सेवा सुचारु गरेका हुन । भवनको उद्घाटन गर्दै मेयर खत्रीले सिन्धुलीका अधिकांश विपन्न महिलाहरुले स्वास्थ्य सेवा पाउने अवस्था सृजना गर्न सेवा विस्तार तथा सिन्धुली अस्पताललाई आवश्यक सहयोग गर्ने बताए ।
खत्रीले सिन्धुली अस्पतालको स्वास्थ्य सेवालाई व्यवस्थित गर्न नगरपालिकाले सक्दो सहयोग गर्ने प्रतिवद्धता समेत व्यक्त गरेका छन ।
