सिन्धुली । सिन्धुलीका एक व्यक्तिमा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार सिन्धुलीका १ जना सहित २७ जनामा कोरोना भाइरस (कोभिड(१९)को संक्रमण पुष्टि भएको हो । सिन्धुलीकी एक युवतिमा कोरोना संक्रमण भएको मन्त्रालयले पुष्टि गरेको हो ।
सिन्धुलीका संक्रमितको स्वाव भने सिन्धुलीबाट पठाईएको नभएको जिल्ला अस्पताल सिन्धुलीले जनाएको छ । उनी बाहिर जिल्लामा बस्ने र स्थायी ठेगाना सिन्धुली भएको हुन सक्ने अस्पतालले जनाएको छ ।
थपिएका संक्रमितमध्ये उपत्यकाका पाँच जना छन् । यस्तै छिमेकी जिल्ला रामेछापमा पनि पहिलो पटक एकजनामा संक्रमण पुष्टि भएको छ ।
मन्त्रालयका अनुसार काठमाडौंमा तीन जना तथा भक्तपुर र ललितपुरमा एक एक जनामा संक्रमण पुष्टि भएको छ । झापाका ९ जना, मोरङ र सुनसरीका एक एक जना, सर्लाहीमा २ जना, मकवानपुर र लमजुङका एकएक जना, कपिलवुस्तका चार र नवलपरासीमा एक जनामा संक्रमण पुष्टि भएको छ । मन्त्रालयका प्रवक्ता डा. विकास देवकोटाले नियमित प्रेस व्रिफिङमा जनाएका छन । थपिएका कोरोना संक्रमित १७ देखि ४२ वर्ष उमेरका छन् ।
यससँगै कुल संक्रमितको संख्या ४०२ पुगेको छ । मन्त्रालयका अनुसार संक्रमण ३६ जिल्लामा पुगेको छ । प्रदेशगत रुपमा सबैभन्दा धेरै संक्रमित प्रदेश ५ मा छन् । प्रदेश १ मा ५४, २ मा एक सय ३६, वागमतीमा २७ र गण्डकी प्रदेशमा चार जना छन् भने प्रदेश ५ मा एक सय ७६, कर्णालीमा एक र सुदूरपश्चिम प्रदेशमा पाँच जना छन् । हालसम्म कोरोना संक्रमणबाट २ जनाको मृत्यु भएको छ ।
