सिन्धुली । कमलामाई नगरपालिकाको शिक्षा शाखालेले नगरभित्रका सामुदायिक तथा संस्थागत विद्यालयलाई शैक्षिक सत्र २०७६ को सबै कक्षाको नतिजा सञ्चारमाध्यमहरुको प्रयोग गरि सार्वजनिक गर्न अनुरोध गरेको छ । आइतबार नगरभित्रका सबै विद्यालयहरुलाई पत्राचार गर्दै नगरपालिकाले उक्त अनुरोध गरेको हो ।
नगर शिक्षा समितिको शनिबार बसेको बैठकले सबै विद्यालयको रिजल्ट बैशाख १८ गतेसम्म गरिसक्नुपर्ने निर्णय गरेको थियो । शाखाले उक्त निर्णयलाई कार्यान्वयन गर्न अनुरोध गर्दै सोहि अनुरुप विद्यालयलाई बालबालिका र अविभावकको सञ्चारमाध्यमको पहुँच हेरी ती सञ्चारमाध्यमको प्रयोग गरि रिजल्ट सार्वजनिक गर्न अनुरोध गरेको हो ।
शाखा प्रमुख शंकरराज लुईटेलद्वारा हस्ताक्षरित पत्रमा रेडियो, टेलिभिजन, पत्रपत्रिका, विद्यालयको आधिकारीक वेभसाईड, फेसवुक पेज, ग्रुप म्यासेज लगाएतको प्रयोग गरि रिजल्ट सार्वजनिक गर्न अनुरोध गरेको हो ।
साथै आफ्ना विद्यालयका सबै शिक्षकलाई विद्यार्थीको रिजल्ट उपलब्ध गराउने र शिक्षकको मोवाईल नम्बर समेत सार्वजनिक गरि विद्यार्थीको पहुँच पुग्ने गरि रिजल्ट सार्वजनिक गर्न समेत नगरपालिकाले अनुरोध गरेको छ ।
