सिन्धुली । सिन्धुलीका इन्जीनियरहरुले सिन्धुली अस्पताललाई सोमबार ‘कोरोना टेष्ट बुथ’ बनाई सहयोग गरेका छन । कोरोना संक्रमणबाट स्वास्थ्यकर्मीलाई सुरक्षित गरि विरामीको कोरोना परिक्षण गर्नका लागि उक्त वुथ उपलब्ध गराएका हुन ।
इन्जिनियर फोरम सिन्धुलीले स्वास्थ्यकर्मीको सुरक्षाका लागि उक्त वुथ निर्माण गरि हस्तान्तरण गरेको हो । यस्तै फोरमले कमलामाई नगरपालिका भित्र सञ्चालनमा रहेका एम्बुलेन्स चालकका लागि १२ सेट पिपिई समेत हस्तान्तरण गरेको छ । राष्ट्रिय आविष्कार केन्द्रका अध्यक्ष महाविर पुनले नेपालमै बनाएको पिपिई सेट हस्तान्तरण गरिएको इन्जिनियर फोरम सिन्धुलीले जनाएको छ ।
रानाले इन्जिनियर फोरमलाई उक्त पिपिई निशुल्क उपलब्ध गराएका थिए भने कोरोना परिक्षण बुथ इन्जिनियर फोरम सिन्धुलीमा आवद्ध इन्जिनियरहरुको लगानीमा तयार गरिएको हो ।
इन्जिनियर फोरमको तर्फबाट कमलामाई नगरपालिकाका मेयर खड्ग खत्रीले अस्पताल विकास समितिका अध्यक्ष प्रलाद पोखरेललाई बुथ, बुथमा प्रयोग गर्न मिल्ने ५ थान ग्लोब्स तथा पिपिई हस्तान्तरण गरेका छन ।
बुथमा सोमबार नै ३ जनाको कोरोना परिक्षण गरिएको छ । पर्साबाट सिन्धुली आएका ३ जना पुरुषको कोरोना परिक्षण गरिएको सिन्धुली अस्पतालले जनाएको छ । अस्पतालका अनुसार उनीहरुको द्रुत परिक्षण किट्स मार्फत कोरोना जाँच गर्दा रिपोर्ट नेगेटिभ आएको अस्पतालका डा. प्रसन्न राजभण्डारीले बताए ।
