सिन्धुली । सिन्धुली अस्पतालका डाक्टरहरुले सेवा प्रवाहको समयमा विरामीका आफन्तले दुव्र्यवहार गरेको भन्दै मंगलबारदेखि सिन्धुली अस्पतालको ओपिडी सेवा बन्द गराएका छन । सुरक्षाको अनुभूति नभएसम्मका लागि ओपीडि सेवा बन्द रहने अस्पतालका डाक्टरहरुले जनाए ।
सोमबार राती अस्पतालमा ल्याईएकी कनपा १० की २० वर्षय अनिषा कार्कीका श्रीमान कृष्ण बस्नेतले डाक्टर प्रकृति मिश्र, डा. ममता यादव र डा.दिवस ढकाललाई गाली गलौज गरेको र हातपातको प्रयास समेत गरेको भन्दै अस्पतालमा कार्यरत डाक्टरहरुले ओपीडि सेवा बन्द गराएका हुन ।
ओपीडि सेवा बन्द गराए पनि ३ जना डाक्टरले आकस्मिक सेवा भने दिईरहेका छन । विरामीलाई मर्का नपर्ने गरि व्यवस्था मिलाई सांकेतिक विरोध गरिएको डा. दिवस ढकालले बताए । विरामीको ड्युटीमा रहेकी डा. प्रकृति र डा. ममताका अनुसार विरामी जाँच गर्दा गर्दै विरामी ल्याएदेखि नै बस्नेतले स्वास्थ्यकर्मी र डाक्टरहरुलाई काम नगर्ने ? भन्दै गाली गलौज गरेका थिए ।
विरामीलाई चलाएको औषधि समेत चित्त नबुझाएपछि मेडिकल सुपरिटेन्डेन एवम प्रसुति रोग विशेषज्ञ सुमित्रा गौतम लगाएतका सिनियर डाक्टरसँग सल्लाह गरेर औषधि चलाईएको डा. प्रकृतिले बताईन । विशेषज्ञकै सल्लाहमा विरामी रिफर गरिएको पनि उनले बताईन । विरामीलाई मानसिक समस्या भएकाले मानसिक डाक्टरले हेर्नुपर्ने हुदा रिफर गरिएको अस्पतालले जनाएको छ ।
४ महिनाको गर्भवति भएको र बरबराउने, चिच्याउने गरेको उक्त विरामीको अवस्था गम्भिर भएकाले रिफर गरिएको थियो । विरामीलाई छिटो सुविधा सम्पन्न अस्पतालमा लान अनुरोध गरेपछि डाक्टरमाथि नै बस्नेतले हातपात गरेको डा. दिवस ढकालले बताए ।
‘विरामीलाई हामीले रेफर गरेको ४०, ४५ मिनेटसम्म विरामी लान नखोजेपछि छिटो लानु भनेका हौं, तेरो अस्पतालमा राख्न नहुने ? पख सिन्धुलीमा कसरी बस्दो रहेछस ? भनेर मलाई धकेलियो, ढकालले भने । तत्काल सुरक्षा मागेर काम गरेको उनले बताए । जिल्ला प्रहरी कार्यालय सिन्धुलीका प्रमुख एसपी चक्रबहादुर सिंहले घटनाको पुष्टि गरेका छन । उनले डाक्टरलाई विरामीका आफन्तले गाली गलौज गरेको र सामान्य हातपातको प्रयास गरेको बताए । डाक्टरहरुले पक्राउ गरि कारवाहि गर्न अनुरोध समेत गरेको उनले जनाए । यता बस्नेतलाई श्रीमतिको अवस्था गम्भिर भएकाले पक्राउ भने नगरिएको प्रहरीले जनाएको छ । डाक्टरलाई दुव्र्यवहार गर्ने बस्नेत स्टलबजारमा रहेको बेवी मेडिकलमा काम गर्ने स्वास्थ्यकर्मी भएको अस्पताल विकास समितिका अध्यक्ष प्रलाद कुमार पोखरेलले बताए ।
अध्यक्ष र फिजिसियन डाक्टरमाथि पनि दुव्र्यवहार
मंगलबार दिउँसो जिल्ला अस्पतालको इमरजेन्सीमा विरामीको स्वास्थ्य जाँच गरिरहेका फिजिसियन डा. अभिषेक भण्डारीमाथि फेरी विरामीले दुव्र्यवहार गरेका छन । जिल्ला अस्पतालमा रेविजको सुइ लगाउन आएका कनपा ६ रातमाटाका देव बहादुर सुनुवारलाई अहेव गोकर्ण देवकोटाले इमरर्जेन्सी भित्र सूई लाउन बोलाउँदा नगई डाक्टरलाई देखाउने भनि लाईनमा गएर गाली गलौज तथा पिट्ने धम्कि दिएका थिए ।
विरामीको लाईनमा गई पालो मिचेर डा अभिषेक भएको ठाउँमा पुगि सुनुवारले गाली गलौज गरेका छन । डाक्टरलाई कुर्चि छोड्न भन्दै पिट्ने धम्कि दिएपछि अस्पताल विकास समितिका अध्यक्ष प्रलाद पोखरेल त्यहाँ पुग्दा आफुलाई समेत समेत धम्कि दिएको पोखरेलले बताए ।
‘के भयो भन्दै पुगेको थिएँ, म माथि नै झम्टिए’ उनले भने । पटक पटक स्वास्थ्यकर्मीमाथि भएको आक्रमणको सृंखला हेर्दा नियोजित घटना जस्तो देखिएको उनले बताए । उनले प्रमुख जिल्ला अधिकारी र जिल्ला प्रहरी कार्यालयलाई घटनाका बारेमा जानकारी गराएको बताए । ‘शान्ति सुरक्षाको प्रत्याभूति दिलाउन सिडियो सावलाई अनुरोध गरेका छौं, शान्ति सुरक्षा मजबुत नभए अस्पताल चलाउन नसक्ने अवस्था आएको छ, उनले भने ।
घटनाहरु लगातार भएको र यसअघि पनि अस्पतालमा यस्ता घटना भईरहेको जानकारीमा आएको प्रमुख जिल्ला अधिकारी जनार्दन गौतमले बताए । अस्पतालका मेडिकल सुपरिटेन्डेन सुमित्रा गौतम जिल्ला बाहिर भएकाले मंगलबार बैठक बस्न नसकेको बताउँदै बुधबार नै बैठक बसि समस्या समाधान गरिने जनाए ।
यस्तै लगातार अस्पतालमा घटना भएपछि अस्पतालका मेडिकल सुपरिटेन्डेन सुमित्रा गौतम बुधबारसम्म रहेको तालिम छोडि मंगलबार साँझ नै सिन्धुली फर्किएकी छिन । बुधबार नै सर्वपक्षिय छलफल गरिने डा. गौतमले बताईन ।
