सिन्धुली । सिन्धुलीका पत्रकारहरुले शुक्रबार जिल्ला प्रशासन कार्यालय सिन्धुलीमा धर्ना दिएका छन् । नेपाल पत्रकार महासंघ सिन्धुलीको आयोजनामा सरकारको नीजि सञ्चारमाध्यममा मात्र विज्ञापन प्रकाशन प्रसारण गर्ने निर्णय विरुद्ध जिल्लाका पत्रकारहरुले जिल्ला प्रशासन कार्यालय सिन्धुलीमा धर्ना दिएका हुन् । नेपाल पत्रकार महासंघको केन्द्रीय कार्यक्रम अनुसार जिल्ला प्रशासन कार्यालय सिन्धुलीको गेटमा धर्ना दिएका हुन् ।
प्रेस तथा अभिव्यक्ति स्वतन्त्रता सम्बन्धि संवैधानिक अधिकारको रक्षा गर्न र सूचना र विज्ञापन सम्बन्धि विभेदकारी र स्वेच्छाचारी निर्णय खारेज गर्न माग गर्दै पत्रकारहरु सिन्धुली लगाएत देशभरका जिल्ला प्रशासन कार्यालयमा धर्ना दिईरहेका छन् । सोहि अनुरुप सिन्धुलीमा पनि धर्ना दिईएको हो ।
धर्नापछि नेपाल पत्रकार महासंघ सिन्धुलीले जेठ ७ गतेदेखि एकसाता संकलन गरिएको हस्ताक्षर प्रधानमन्त्रीलाई बुझाएको छ । जिल्ला प्रशासन कार्यालय सिन्धुलीमार्फत प्रधानमन्त्रीलाई हस्ताक्षर पठाएको हो ।
संकलित हस्ताक्षर महासंघका जिल्ला अध्यक्ष बाबुराम देवकोटाले सहायक प्रमुख जिल्ला अधिकारी दिपेन्द्र पौडेललाई हस्तान्तरण गरेका हुन् । सहायक प्रजिअ पौडेलले उक्त हस्ताक्षर प्रधानमन्त्री तथा मन्त्री परिषदको कार्यालयमा पठाउने प्रतिवद्धता समेत व्यक्त गरेका छन् ।
