सिन्धुली । मध्यपूर्वमा जारी युद्धका कारण निर्माण उद्योगमा प्रयोग हुने डिजेल, पेट्रोल, मट्टितेल लगायतका इन्धन सामाग्रीहरूमा पटक पटक भइरहेको अत्यधिक एवम् अप्रत्याशित मूल्यवृद्धिले गर्दा निर्माण उद्योग ठप्प हुने स्थितिमा पुगेको भन्दै निर्माण व्यवसायीहरुले निर्माण उद्योगमा आपतकाल घोषणा गर्न माग गरेका छन् ।
सिन्धुली निर्माण व्यवसायी संघ सिन्धुलीले शनिबार प्रेस विज्ञप्ती जारी गर्दै सरकार सहित सम्बन्धित सबै निकायको गम्भीर ध्यानाकर्षण गराएको हो । संघका अध्यक्ष उद्धव दाहालद्वारा जारी विज्ञप्तीमा निर्माण कार्य तीव्र रुपमा हुने समयमै इन्धन सामग्रीहरू सहित निर्माण सामग्रीहरूमा निरन्तर भइरहेको अत्याधिक मूल्यवृद्धि एवम् निर्माण सामग्रीको अभावले निर्माण व्यवसायीहरूलाई ठूलो आर्थिक भार परेको जनाउँदै निर्माण उद्योगमा ‘आपतकाल’ घोषणा गरी व्यवसायीहरूलाई अविलम्ब राहत दिन संघले माग गरेको छ ।
प्रत्येक आयोजनामा मूल्यवृद्धि भए अनुरुप हालको कानूनी व्यवस्थाबाट मूल्य समायोजन हुन नसक्ने हुँदा मूल्य समायोजनको मार्ग निर्देशिका – २ तत्काल जारी गर्न र सबै अवधिका ठेक्काको हकमा मूल्य समायोजनको व्यवस्था गरी मूल्यवृद्धिको समस्याबाट पीडित साना ठुला सबै तह र तप्काका निर्माण व्यवसायीहरूको समस्या तुरुन्त सम्बोधन गर्न संघले विज्ञप्ती मार्फत सरकार समक्ष अपिल गरेको छ ।
संघले इन्धनजन्य सामग्रीहरू सहित निर्माण कार्यमा व्यापक प्रयोग हुने बिटुमिन, सिमेण्ट, डण्डी लगायतका निर्माण सामग्रीहरूमा समेत निरन्तर भइरहेको अप्रत्याशित एवम् अत्यधिक मूल्यवृद्धि र बजारमा उक्त सामग्रीहरूको अभावले निर्माण उद्योग ठप्प हुने स्थितिमा पुगेको उल्लेख गरेको छ ।
यस्तै देशका विभिन्न ठाउँमा क्रसर उद्योगमा देखिएको समस्याले निर्माण उद्योग थप आक्रान्त भएको उल्लेख गर्दै निर्माण उद्योगहरु अत्यन्त विषम परिस्थितिमा रहेको बताईएको छ ।
केन्द्रीय महासंघले बारम्बार नेपाल सरकार लगायतका निकायहरूमा पत्राचार गरेता पनि समस्या समाधान हुने गरी अहिलेसम्म केही कार्यान्वयन नभएको समेत विज्ञप्तीमा उल्लेख गरिएको छ ।
ठेक्काको मूल्य समायोजन राष्ट्र बैंकको मूल्य सूचकाङ्क अनुसार हुने भएकाले बजारमा निर्माण सामग्रीहरूको अत्याधिक मूल्यवृद्धि भएता पनि राष्ट्र बैंकको इन्डेक्समा उक्त सामग्रीहरूको मूल्य घटेको देखाइने प्रचलनका कारण निर्माण उद्योगमा थप संकट देखिएको पनि विज्ञप्तीमा उल्लेख गरिएको छ ।
