सिन्धुली । भदौ २४ र २५ गते जेनजी आन्दोलनको नाममा सरकारी कार्यालयहरु, सार्वजनिक तथा नीजि सम्पत्ति तोडफोड र आगजनी गर्ने १५ जना पक्राउ परेका छन् । जिल्ला प्रहरी कार्यालय सिन्धुलीले १५ जनालाई पक्राउ गरिएको र थप १५ जनाको पहिचान गरि पक्राउ पूर्जी जारी भएको जनाएको छ । जिल्ला प्रहरी कार्यालय सिन्धुलीले सोमबार पत्रकार सम्मेलनको आयोजना गरि १५ जना पक्राउ गरिएको जनाएको हो ।
जिल्ला प्रहरी कार्यालय सिन्धुलीका प्रमुख एसपी लालध्वज सुवेदीले अनुसन्धानको पहिलो चरणमा १५ जना पक्राउ गरिएको बताएका छन् । पहिलो चरणमा सिन्धुली जिल्ला अदातल, जिल्ला प्रशासन कार्यालय, मालपोत कार्यालय र कमलामाई नगरपालिका वडा नं. ५ को वडा कार्यालयमा आगजनी गर्ने व्यक्तिहरुलाई पहिचान गरि पक्राउ गरिएको उनले बताएका छन् ।
पक्राउ पर्नेमा कनपा ६ धुराका २० वर्षिय सुजन शाह, कमलामाई नगरपालिका वडा नं. ८ का ३६ वर्षिय रत्नबहादुर श्रेष्ठ, कमलामाई नगरपालिका वडा नं. ५ का ४७ वर्षिय फौद बहादुर थापा मगर, सर्लाहीका रामनगर गाउँपालिका ६ घर भई सिन्धुलीमा पप्पु किचेन डेकोर भाँडा पसल सञ्चालन गर्ने २५ वर्षिय पप्पु कुमार शाह, कमलामाई नगरपालिका वडा नं. ५ बस्ने २७ वर्षिय रवन चौधरी, कमलामाई नगरपालिका १२ का ३१ वर्षिय क्षितिज श्रेष्ठ, भारतको सितामढी घर भई कमलामाई नगरपालिका ६ धुराबजार बस्ने २२ वर्षिय देवनन्दन शाह, कमलामाई नगरपालिका वडा नं. ४ बस्ने २४ वर्षिय सविन लामा रहेका छन् ।
यस्तै कमलामाई नगरपालिका वडा नं. १२ को २३ वर्षिय डोर बहादुर सार्की, महोत्तरीको गौशाला नगरपालिका वडा नं. २ घर भई हाल कमलामाई नगरपालिका वडा नं. ५ बस्ने राजु महरा, तिनपाटन गाउँपालिका ११ का २५ वर्षिय होम बहादुर लुंगेली मगर, कमलामाई नगरपालिका वडा नं. ८ का ३४ वर्षिय ओम बहादुर खत्री, मरिण गाउँपालिका वडा नं. ८ घर भई कमलामाई नगरपालिका ४ धुराबजार बस्ने ३० वर्षिय कमल पाख्रिन र वर्दिवास नगरपालिका १४ महोत्तरी घर भई कमलामाई नगरपालिका ६ बस्ने हरिचन सोनार पक्राउ परेका छन् ।
पक्राउ परेकाहरुलाई अपराधिक उपद्रव गर्न नहुने कसुरमा अनुसन्धान भईरहेको एसपी सुवेदीले बताएका छन् । सिसिटिभि फुटेज, सामाजिक सञ्जालमा उपलब्ध सामग्रीहरुको आधारमा प्रहरीले अनुसन्धान जारी राखेको छ । सोहि आधारमा पहिचान भएका १५ जना विरुद्ध पक्राउ पूर्जी समेत जारी भएको उनले बताएका छन् । पक्राउ परेकाहरु कोहि अपराधिक क्रियाकलापमा जोडिएका पनि भेटिएका छन् । कतिपय ग्यारेजमा काम गर्ने, व्यवसाय गरेर बसेका व्यक्तिहरु समेत भेटिएका छन् । केहि सरकारी कार्यालयहरुले कारवाहि गरिदिन पत्राचार गरेका कारण पनि प्रहरीले अनुसन्धानलाई तिव्रता दिएको जनाएको छ । पक्राउ परेका व्यक्तिहरु एकै जना धेरै वटा सार्वजनिक तथा व्यक्तिगत सम्पत्ति जलाउन पुगेको समेत पाईएको प्रहरीले जनाएको छ ।
प्रहरीले व्यक्तिगत वा संस्थागत उजुरी दिन र आन्दोलनका क्रममा भएका तोडफोड र आगजनीका भिडियो, फोटो तथा प्रमाणहरु उपलब्ध गराउन समेत आग्रह गरेको छ । जेनजी आन्दोलनमा २३ गतेको आन्दोलनमा आयोजक स्पष्ट भएको तर २४, २५ गते आन्दोलनको आधिकारिकता विना तोडफोड आगजनी भएकाले प्रहरीले अपराधका रुपमा तोडफोड र आगजनीलाई अनुसन्धान सुरु गरेको छ ।
अनुसन्धानमा एकै खालका व्यक्तिहरु धेरै ठाउँमा तोडफोड र आगजनीमा संलग्न भएको देखिएको सुबेदीले बताएका छन् । आन्दोलनको नेतृत्व गर्ने, उकास्ने र आगजनीमा संलग्न सबै पक्राउ पर्ने उनले बताएका छन् ।
