सिन्धुली । जिल्लामा विहिबार पेट्रोलियम पदार्थमा भएको मुल्यवृद्धि विरुद्ध विद्यार्थी तथा नागरिकको आन्दोलन चर्किन्छ । सरकार विरुद्ध उनीहरुले प्रदर्शन गर्छन् । प्रदर्शनकारीले निशेधित क्षेत्र तोड्छन् । जनपथ प्रहरी र सशस्त्र प्रहरीका सुरक्षाकर्मीहरुले भिड नियन्त्रणका लागि सम्झाउँछन् तर आन्दोलनकारीहरु आगजनी, तोडफोडमा उत्रिन्छन् । उनीहरुले तोडफोडमा लागेपछि पानीको फोहोराले सुरक्षाकर्मीहरुले भिड नियन्त्रण गर्ने प्रयास गर्छन् । फोहोराले पनि भिड नियन्त्रण हुँदैन । भिड नियन्त्रण नभएपछि हवाई फायर गर्छन् । त्यसपछि पनि भिड नियन्त्रण हुँदैन ।
झनै आक्रोशित आन्दोलनकारीहरुले सुरक्षाकर्मीहरु माथि नै पटक पटक जाईलाग्छन् । प्रहरीले संयमता अपनाउँदै सम्झाउँदै जान्छन् तर आन्दोलन नियन्त्रण हुँदैन । उनीहरुले अन्तमा घुँडामुनी गोली प्रहार गर्छन् केहि आन्दोलनकारी घाईते हुन्छन् । एम्बुलेन्सले घाईतेको उद्धार गर्छ ।
यता भिड नियन्त्रण हुन निकै कठिन हुन्छ । आक्रोशित भिड नियन्त्रण गर्न नसक्दा प्रहरी नै असुरक्षित हुन्छन् । प्रहरीमाथि नै गोली प्रहार हुन्छ । प्रहरी घाईते हुन्छन् । केहि आन्दोलनकारीहरु पक्राउ पर्छन् । भिड त्यतिबेलासम्म पनि नियन्त्रण हुँदैन । भिड नियन्त्रण नभएपछि प्रमुख जिल्ला अधिकारीले कफ्र्यु लगाउँछन् । सेना परिचालन हुन्छ । सेनाले भिड नियन्त्रणको प्रयास जारी राख्छन् । अन्तमा भिड तितरवितर हुन्छ । सेनाले माईकिङ गरेर नागरिकलाई सचेत बनाउँछन् र गस्ती सुरु गर्छन् र केहि शान्त वातापरण बन्छ ।
यो कुनै साँच्चिकै आन्दोलन थिएन । यो त भिड नियन्त्रणका लागि सुरक्षाकर्मीले प्रदर्शन गरेको नमुना अभ्यास (डेमो) थियो । भवानी बक्स गणको मैदानमा भएको यो डेमो प्रदर्शनले आन्दोलन वा भिडमा मानवअधिकारमैत्री सुरक्षा कबज कसरी प्रयोग गर्ने भन्ने अभ्यास गरिएको थियो ।
जिल्ला प्रहरी कार्यालय सिन्धुलीको आयोजनामा भएको उक्त अभ्यासमा जिल्लाका तीन वटै सुरक्षा निकायका सुरक्षा प्रमुख, सुरक्षाकर्मीहरुको सहभागिता रहेको थियो । विशेष गरि विहिबार नेपाल प्रहरी, सशस्त्र प्रहरी र नेपाली सेनाको भिड नियन्त्रण तथा शान्ति सुरक्षामा रहने भूमिकाको विषयमा नमुना अभ्यास प्रदर्शन गरिएको थियो ।
यो अभ्यासमा भवानी बकस गण, जिल्ला प्रहरी कार्यालय सिन्धुली र शसत्र प्रहरी बल अनाश्रीत गुल्म सिन्धुलीको संयुक्त टोली सहभागि थियो । निर्वाचन पूर्वतयारी र सम्भावित भिडभाड र तोडफोडलाई मध्यनजर गरि त्यसको नियन्त्रण स्वरुप यो अभ्यास गराईएको थियो ।
डेमो प्रदर्शन कार्यक्रमलाई सम्बोधन गर्दै प्रमुख जिल्ला अधिकारी स्किम श्रेष्ठले भदौ २३ र २४ गतेको आन्दोलन र सम्भावित भिडभाड नियन्त्रणलाई अभ्यासले निखारता ल्याउने बताईन । अहिलेको संवेदनशिल समयमा भिड नियन्त्रणको सिकाईले सुरक्षाकर्मीहरुलाई संवेदनशिल तरिकाले भिड नियन्त्रण सहयोग पुग्ने र सुरक्षाकर्मीमा निखारता ल्याउने बताएकी छिन् । उनले भिड नियन्त्रणको सिप सुरक्षाकर्मीहरुको सुरक्षा, नागरिकको जीउधनको सुरक्षा र राज्यप्रति जनताको विश्वास बढाउन महत्वपूर्ण हुने विश्वास व्यक्त गरिन् ।
सुरक्षाकर्मीहरुलाई भिड नियन्त्रण सम्बन्धि तालिम प्रदान गरेपछि तालिमको समापनमा डेमो प्रदर्शन गरिएको थियो । डेमो प्रदर्शनपछि तालिमका प्रशिक्षक तथा सहभागिलाई प्रमाणपत्र समेत प्रदान गरिएको थियो ।
