सिन्धुली । जेनजी आन्दोलनको दोश्रो दिन सिन्धुलीको आन्दोलन तोडफोड, आगजनीमा परिणत भयो । मंगलबार दिउँसोसम्म शान्तीपूर्ण रहेको आन्दोलन दिउँसोदेखि सरकारी कार्यालय, राजनीतिक दलका कार्यालहरु र व्यक्तिका घरमा समेत आगजनी र तोडफोडमा परिणत भयो । उनीहरुले जिल्लाका अधिकांश सरकारी कार्यालयमा आगजनी गरेका छन् ।
जेनजीका समर्थकहरुले जिल्ला अदालत सिन्धुली, जिल्ला प्रशासन कार्यालय सिन्धुली, कमलामाई नगरपालिका सिन्धुली, जिल्ला समन्वय समिति सिन्धुली, करदाता सेवा कार्यालय सिन्धुली, कमलामाई नगरपालिकाको वडा नं. ५ र ६ को कार्यालयमा आगजनी र तोडफोड गरेका छन ।
यस्तै उनीहरुले नेपाली कांग्रेस सिन्धुली, नेकपा एमाले सिन्धुली र माओवादी पार्टी कार्यालय सिन्धुलीमा आगजनी गरेका छन । सिन्धुली जिल्ला अदालत सिन्धुली, जिल्ला प्रशासन कार्यालय सिन्धुली, मालपोत कार्यालय, कमलामाई नगरपालिकाको सरकारी सवारी साधनहरुमा आगजनी गरेका छन ।
आन्दोलनकारीले कमलामाई नगरपालिका नगरप्रमुख उपेन्द्र पोखरेलको कनपा ४ पोखरेल गाउँमा रहेको घरमा आगजनी गरे । सिन्धुली क्षेत्र नम्बर १ का प्रतिनिधिसभा सदस्य तथा नेपाली काग्रेसका सचेतक श्याम घिमिरेको घरमा तोडफोड तथा आगजनी गरेका छन । यस्तै प्रदेशसभा सदस्य छेत्रबहादुर बम्जनको घरमा तोडफोड भएको छ ।
यस्तै नेकपा एमालेका अध्यक्ष महेन्द्रदेव श्रेष्ठ, बागमती प्रदेशका पूर्व स्वास्थ्यमन्त्री प्रदीप कटुवालको घरमा समेत आन्दोलनकारीले तोडफोड तथा आगजनी गरेका छन ।
सुरक्षाकर्मीले आन्दोलनको सुरुवातमा आन्दोलनकारीलाई रोक्ने प्रयास गरे पनि सुरक्षाकर्मीहरुले थप क्षति हुन नदिन भन्दै सुरक्षा व्यवस्थालाई खुकुलो बनाएको थियो । दिउँसो सुरक्षा समितिले जेनजीका जिल्ला स्थित नेतृत्वसँग आन्दोलन शान्तीपूर्ण बनाउन वार्ता गरे पनि वार्ता निश्कर्ष विहिन भएको थियो । उनीहरुले दिनभर सदरमुकाम सिन्धुलीमाढीका शान्तिनगर चोक, प्रशासन चोक, जुनारचोक, सिन्धुलीमाढी बजारमा टायर बालेर प्रदर्शन र नारावाजी गरिरहे ।
करदाता सेवा कार्यालय रहेको नेपाल पत्रकार महासंघ सिन्धुलीका संस्थापक अध्यक्ष शेषराज दाहाल र पूर्व अध्यक्ष सञ्जय कुमार दाहालको घरमा तोडफोड भयो । स्थानीयको पहलमा उनीहरुलाई सुरक्षित स्थानमा अवतरण गरिएको छ ।
यसैबीच जेनजीका प्रदर्शनकारीहरुले खुर्कोट र दुधौलीमा पनि आन्दोलन गरेका छन । दुधौली नगरपालिकाको गेट अगाडी उनीहरुले प्रदर्शन गरे । आन्दोलनका कारण मदनभण्डारी राजमार्ग, मध्यपहाडी राजमार्ग र विपी राजमार्ग पूर्ण रुपमा बन्द रह्यो । सिन्धुली माढीबजार आन्दोलनका कारण दिनभर बन्द रह्यो ।
खुर्कोटमा आन्दोलनकारीले नेकपा एमालेका गोलञ्जोर ७ को वडा कार्यालयको बोर्ड र कार्यालयका कुर्सी लगाएतका सामान झिकेर फालिदिएका छन । जिल्ला प्रहरी कार्यालय सिन्धुलीका अनुसार जिल्लामा कहाँ कति क्षति भयो एकीन विवरण संकलन गर्न सकिएको छैन ।
