सिन्धुली । बागमती प्रदेशका युवा तथा खेलकुद मन्त्री मिनकृष्ण महर्जनले आफुले जिल्लामा जाँदा पहिले खेलाडीलाई खोज्ने बताए । उनले करीब ४० वर्षदेखि आफु खेलकुद क्षेत्रमा क्रियाशिल रहेको र खेलाडी भएकाले पनि जिल्लाहरुमा खेलकुद र खेलाडीको विकासमा आफ्नो पहिलो प्राथमिता रहेको बताए ।
जिल्ला खेलकुद विकास समिति सिन्धुलीको आयोजना तथा जिल्ला समन्वय समिति सिन्धुलीको समन्वयमा सोमबारदेखि सिन्धुलीमाढीमा सुरु भएको १३ औं राष्ट्रपति रनिङ शिल्ड तथा प्रथम जिल्ला स्तरीय खेलकुद महोत्सव २०८१ को उद्घाटन गर्दै मन्त्री महर्जनले सिन्धुलीको खेलकुद विकासमा आफुले सक्दो बजेटको व्यवस्था गर्ने प्रतिवद्धता समेत व्यक्त गरे ।
जिल्ला खेलकुद विकास समिति सिन्धुलीको आयोजनामा सोमबारदेखि सुरु भएको महोत्सव फागुन १३ गतेसम्म सञ्चालन हुनेछ । खेलकुदको विकास, खेलाडीहरुको पहिचान र उनीहरुको प्रोत्साहनका लागि खेलकुद महोत्सवको आयोजना गरिएको जिल्ला खेलकुद विकास समिति सिन्धुलीले जनाएको छ ।
महोत्सवको उद्घाटनमा बोल्दै बागमती प्रदेश सभा सदस्य छेत्र बहादुर बम्जनले खेल र खेलाडीको विकासमा सबै तहका सरकारको ध्यान जानुपर्ने बताए । उनले नेपाललाई विश्वमा चिनाउने खेलाडी उत्पादन गर्न खेलकुद महोत्सव महत्वपूर्ण रहने विश्वास व्यक्त गरे ।
कार्यक्रममा बोल्दै बागमती प्रदेशसभा सदस्य मातृका भट्टराईले राज्यले खेललाई विकासको महत्वपूर्ण पाटोको रुपमा लिनुपर्नेमा जोड दिए । कार्यक्रममा जिल्ला समन्वय समिति सिन्धुलीका प्रमुख कारसाङ लामाले खेल र खेलाडीको विकास र खेलाडी उत्पादनमा महोत्सव महत्वपूर्ण हुने विश्वास गरे ।
जिल्ला खेलकुद विकास समिति सिन्धुलीका अध्यक्ष विर बहादुर थिङ तामाङ (विशाल) को अध्यक्षतामा भएको कार्यक्रममा विभिन्न खेलप्रेमी, राष्ट्रभक्ति सांगितिक प्रस्तुतिहरु प्रस्तुत गर्नुका साथै तेक्वान्दो र कराँतेको नमुना प्रस्तुती गरिएको थियो । नौ दिनसम्म सञ्चालन हुने खेलकुद महोत्सवमा १० प्रकारका खेलहरु हुनेछन । भलिवल, फुटबल, क्रिकेट, व्याडमिन्टन, कबड्डी, कराँते, तेक्वान्दो, एथलेक्टिस, म्याराथन, बक्सिङ खेल समावेश गराईने आयोजकले जनाएको छ । खेलमा नौ स्थानीय तहका १ हजार ३ सय ३३ खेलाडीहरुले प्रतियोगितामा भाग लिनेछन । महोत्सवमा विभिन्न खेलहरु प्रदर्शन हुनुका साथै खेल क्षेत्रमा योगदान दिने खेलाडीहरुलाई सम्मान समेत गरिने छ ।
प्रतियोगितामा विजेता खेलाडीहरुलाई शिल्ड, मेडल, प्रमाणपत्रको व्यवस्था पनि गरिएको छ । यस्तै खेलको विधागत पुरस्कारको समेत व्यवस्था गरिएको छ । महोत्सवको उद्घाटन पूर्व सिन्धुलीमाढी बजारमा मार्चपास तथा ¥यालीको आयोजना गरिएको छ । खेलमा लगानी हुने तर खेलाडी टिकाउन नहुने समस्यालाई कम गर्न महोत्सव महत्वपूर्ण हुने समेत आयोजकले विश्वास लिएको छ । प्रतियोगिता तथा महोत्सवका लागि करिब ४१ लाख खर्च लाग्ने समेत आयोजकले जनाएको छ । समितिमा बजेट नभएकाले स्थानीय तह, विभिन्न संघसंस्थाहरु लगाएतको सहयोगमा महोत्सव आयोजना गरिएको छ ।
खेलको सुरुवात मैत्रीपूर्ण भलिबलबाट सुरु गरिएको छ । वर्द बहादुर गण र जिल्ला भलिवल टिमबीच भलिवल प्रतियोगिता सुरु गरिएको छ । वर्द बहादुर गणका गणपति र जिल्ला खेलकुद विकास समिति सिन्धुलीका अध्यक्ष विरबहादुर थिङले मायाको चिनो हस्तान्तरण गरेपछि भलिबल सुरु गरिएको थियो भने मन्त्री महर्जनले जिल्ला खेलकुद विकास समितिका अध्यक्ष तामाङलाई भलिवल हस्तान्तरण गरेका थिए ।
