सिन्धुली । मंगलबार विहानै एलपी ग्याँसको नोवेल सिलिण्डर आउने चर्चा थियो । सदरमुकामका डिपोहरुमा चारसय भन्दा बढी सिलिण्डर ग्याँस आउने चर्चाले जिल्लाका उपभोक्ताहरु सबेरै ग्याँसको लाईनमा खाली शिलिण्डर लिएर बसे । उपभोक्ताले ग्याँस आउनुअघि नै नाम टिपाएका थिए । जुन डिपोहरुमा नाम टिपाएका थिए त्यहि डिपोमा लाईनमा लागे । नाम टिपाउनुपर्ने थाहा नपाएका कतिपय उपभोक्ताले विहानै डिपोमा लाईन लाग्न खाली सिलिण्डर बोकेर पुगे । ग्याँस पनि आयो तर उपभोक्ताले ग्याँस लिन पाएनन् ।
कमलामाई नगरपालिका वडा नं. ४ ढुंग्रेबासमा अरु जस्तै मदन प्रसाद चौलागांईं पनि लाईन लाग्न पुगे । मंगलबार बिहान ३ बजेदेखि लाइन बस्दा पनि चौलागाईंले ढुङ्ग्रेबासमा ग्याँस पाएनन् । उनले प्रशासनले ग्याँसको अभाव नभएको भनिरहेको कुरालाई व्यंग्य गर्दै भनेका छन्, ‘विहान ३ बजेदेखि लाईन बस्दा पनि ढुंग्रेबासमा ग्याँस पाइएन, अभाव छैन भनु भने रित्तै फर्कने मान्छे म नै हुँ । तीन सय (सिलिण्डर) झारो, ५ सय भन्दा माथि सिलिण्डर थिए ।’
यस्तै कनपा ६ का मोहन धमलाले तीन हप्तादेखि ग्याँसका लागि पटक पटक धाए तर रित्तो सिलिण्डर लिएर घर फर्केका छन् । उनी भन्छन्, ‘तीन हप्ता भयो रित्तो सिलिण्डर फर्केका छौं हामी । कसरी सहज भयो बुझ्न सकिन ।’
यता कमलामाई नगरपालिका वडा नं. ५ की पवित्रा रायमाझी विगत केहि हप्तादेखि आगोमा खाना बनाईरहेकी छिन् । विहानै ग्याँस आएको सुनेपछि पाईन्छ की भन्दै खोजी गरिन तर ग्याँस पाईनन् ।
कमलामाई नगरपालिका वडा नं. ४ का उद्धव थापाले भने, ‘हेर्न नपाउँदै सकियो, लिनु त के पाउनु र ?’ उनी पनि कनपा ४ ढुंग्रेबासमा ग्याँस लिन लाईनमा थिए तर ग्याँस झर्ना साथ सकिएपछि उनले त्यस्तो प्रतिक्रिया जनाएका छन् ।
यस्तै कमलामाई नगरपालिका वडा नं .६ पानीट्यांकीमा घरभाडामा बस्ने अनिता मगरले ग्याँस नपाएपछि सामाजिक सञ्जाल फेसबुकमा लेखेकी छिन्, ‘आजभन्दा २० दिन अगाडि नाम टिपाएको ग्याँस आज पनि पाईएन, बोल्न सक्नि र धनिहरुलाई मात्र रैछ सबै कुरा ।’ उनले ग्याँसको लाईन, आफु र छोरीको फोटो हाल्दै लेखेको उक्त स्टाटसमा ग्याँस नभएर १३, १४ दिनदेखि चिउरा र चाउचाउ खुवाईर राखेको समेत बताएकी छिन् । उनले लेखेकी छिन्, ‘नयाँ सरकारले त धेरै सुविधा दिन्छ रे खै त आज आएर भात पकाएर खान नपाउँदा कसले बुझोर ?’
जिल्लामा ग्याँस बेला बेलामा आए पनि उपभोक्ताको माग धान्न सकेको छैन । मंगलबार जिल्ला सदरमुकामाका चार वटा डिपोमा करीब ६ सय सिलिण्डर नोवेल ग्याँस झरेको थियो । कमलामाई नगरपालिका वडा नं. ६ धुराबजार, स्टल बजार र दुई नम्बर बजारका डिपोमा ग्याँस नपाएर उपभोक्ताहरु रित्तै घर फर्के भने कनपा ४ ढुंग्रेबासमा पनि ग्याँसले पचास प्रतिशत पनि माग धान्न सकेन ।
ग्याँसको अभावले विशेष गरि गरिब, कोठामा बस्ने र एक वटा मात्र सिलिण्डर हुनेलाई बढी समस्या भएको छ । त्यसमा पनि पढ्नका लागि सदरमुकाम बस्ने विद्यार्थीहरुलाई चर्को समस्यामा पारेको छ । सामान्य नागरिकले सहजै ग्याँस पाउन सक्ने अवस्था छैन । न उपभोक्ताले ग्याँसको अभावको कारण थाहा पाएका छन्, नत व्यवसायीले ग्याँस किन कमी भयो बुझ्न सकेका छन् तर ग्याँसको अभावले नागरिकले सास्ती भोगिरहेका छन् ।
जिल्ला प्रशासन कार्यालय सिन्धुलीका सहायक प्रमुख जिल्ला अधिकारी दिपेन्द्र पौडेलले ग्याँसको अभाव अन्यत्र जस्तो सिन्धुलीमा नरहेको बताए । उनले भने, ‘ग्याँस आईरहेको छ, अनुगमनमा पनि त्यस्तो समस्या देखिएको छैन, आउने क्रममा पनि भएकाले केहि समयमा ग्याँसको समस्या समाधान हुन्छ ।’ साझा नेपाल साप्ताहिकबाट
