सिन्धुली । सोमबार रातीको हावाहुरीले जिल्लाका विभिन्न ठाउँमा भौतिक सम्पत्तिमा क्षति पुराएको छ । विशेष गरि घर, गोठ, सामुदायिक भवन र तरकारीका टनेल तथा कृषि बालीमा समेत क्षति गरेको छ । जसको एकीन विवरण आउन भने बाँकी छ ।
जिल्ला प्रहरी कार्यालय सिन्धुलीको प्रारम्भिक तथ्यांक अनुसार जिल्लाका विभिन्न ठाउँमा गरि २८ वटा घरमा क्षति पुगेको छ । १४ वटा गोठ, एक वटा तरकारीको टनेल र एक वटा सामुदायिक भवन र १ विद्यालयमा क्षति पुगेको छ । यस्तै एक वटा चौपायाको समेत मृत्यु भएको छ । जिल्ला प्रहरी कार्यालय सिन्धुलीका डिएसपी सुर्य प्रकाश सुवेदीका अनुसार ६१ लाख ५० हजार बराबरको भौतिक क्षति भएको छ ।
तिनपाटन गाउँपालिकामा ७ वटा घर र चारवटा गोठमा क्षति पुगेको छ । तीनपाटन गाउँपालिका वडा नं. ८ बाहुनतिल्पुङमा ६ घर, तीन गोठमा क्षति पुगेको छ भने वडा नं. १ नर्कटेमा १ घर र १ गोठमा क्षति पुगेको छ ।
तीनपाटन ८ मा टेक बहादुर श्रेष्ठ, विष्णुमाया लुंगेली, रविन्द्र अछामी, जंग लामा, दल बहादुर लामाको घरको छानो उडाएको छ भने कर्ण लामाको भान्सा घरबाट आगो सल्किँदा घरभित्रका लत्ताकपडा, अन्नपात जलेका छन् । यस्तै तेजबहादुर सार्की, रिता बस्याल र जंग लामाको गोठमा पनि क्षति पुगेको छ ।
यस्तै तीनपाटन १ नर्कटेका पिताम्बर सराङ्गीको गोठ र होम बहादुर सार्कीको घरको छानो उडाएको छ । तीनपाटन गाउँपालिका–९ सालुकेमा हुरीबतास लगत्तै एक घर र गोठमा आगलागी हुँदा पूर्ण रूपमा क्षति भएको छ ।
यस्तै गोलञ्जोर ५ खानी निगालेमा पनि हावाहुरीले भौतिक क्षति गराएको छ । खानी निगालेमा २ घर, १ गोठ, एक तरकारीको टनेल र एक सामुदायिक भवनमा क्षति पुगेको छ । कुन्ज बहादुर तामाङको घरको छानो र गणेश बहादुर श्रेष्ठको गाईगोठको छानो हावाहुरीले उडाएको छ ।
एक बहादुर थापा मगरको माटो र जस्ताले बनेको १ तले कच्ची घर पुर्ण रुपमा क्षति भएको छ । चन्द्र कुमारी श्रेष्ठको तरकारीको लागि बनाईएको प्लाष्टिकको टनेलमा क्षति पुगेको छ भने खनियाँखर्कमा रहेको । इँट्टाको गाह्रो र जस्ताको छानो भएको १ तले सामुदायिक भवनको छानो उडाएको छ ।
यस्तै गोलञ्जोर १ मा रहेको कालिका प्राथमिक विद्यालय जुकेपानीको छानो र काठ सबै उडाएको छ । उक्त विद्यालयको १० लाख बराबरको क्षति भएको छ ।
यस्तै हावाहुरी र असिनाले हरिहरपुरगढी ९ जमुनेमा श्याम भुजेलको काठ र माटोले बनेको जस्ताले छाएको २ तले घरको छाना उडाई क्षति पु¥याएको छ ।
त्यस्तै दुधौली नगरपालिका वडा नं. १३ यानामा प्रेम बहादुर पाख्रिनको गाई गोठमा भत्किंदा एक वटा ब्याउने भैसीको मृत्यु भएको छ भने दुधौली नगरपालिका ११ सान्दानेमा हावाहुरीले ३ घरको छाना उडाएको छ । जगत बहादुर सुनुवार, श्याम कार्की र भैरव बहादुर राउतको घरको छाना उडाएको प्रहरीले जनाएको छ ।
यस्तै हावाहुरीले सबैभन्दा बढी कमलामाई नगरपालिकामा क्षति गरेको छ । कमलामाई नगरपालिकाभित्र पनि हावाहुरीका कारण निक्कै धेरै भौतिक क्षति भएको छ । कमलामाई नगरपालिका वडा नं. ९, १०, ११, १२, १३ मा हावाहुरीले १३ घर र ६ वटा गोठमा क्षति गराएको छ । कमलामाई नगरपालिका वडा नं. ११ मा ३ वटा घर र दुई वटा गोठमा हावाहुरीले क्षति पु¥याएको छ । हावाहुरीले केहरमान वाईबाको काठ र जस्ताको छानो भएको २ तल्ले कच्ची घरको छानो उडाउदा चालिस हजार बराबरको क्षति भएको छ । सोहि वडाका प्रेम बहादुर खड्काको घर र गोठमा क्षति पुगेको छ । उनको बाँसको बेरा खरको छानो भएको १ तल्ले घरको खरको छानो र काठ र जस्ताको छानो भएको १ तल्ले कच्ची गोठको छानो उडाउँदा पचास हजार बरावरको क्षति भएको छ ।
यस्तै भक्त बहादुर स्याङताङको ढुंङ्गा,काठ र जस्ताको छानो भएको १ तल्ले कच्ची घरको छानो उडाउँदा असी हजार बराबरको क्षति भएको थियो । जित बहादुर घलानको काठ र जस्ताको छानो भएको २ तल्ले कच्ची गोठको जस्ताको छानो उडाउँदा पच्चिस हजार बराबरको क्षति भएको छ ।
हावाहुरीले कमलामाई नगरपालिका वडा नं. १० मा ४ वटा घरमा क्षति पुराएको छ । बद्री कटुवालको ढुंङ्गा, काठ र जस्ताको छानो भएको भएको २ तल्ले कच्ची घरको छानो उडाएको छ ।
दीर्घ माया राउतको ढुंङ्गा, काठ र जस्ताको छानो भएको २ तल्ले कच्ची घरको उत्तर तर्फको पर्खाल भत्किएको छ । रुका कार्कीको काठ र जस्ताको छानो भएको १ तल्ले कच्ची घरको जस्ताको छानो उडाएको छ । यस्तै दुर्गा बस्नेतको घरमा घरमाथि रहेको रुख ढल्दा घरमा क्षति पुगेको छ ।
यस्तै कमलामाई नगरपालिका वडा नं. १२ मा पनि हावाहुरीले क्षति गरेको छ । यो वडामा ३ घर र १ गोठमा क्षति पुगेको जानकारी प्राप्त भएको छ । उक्त वडामा एकराज गुर्माछाने घरको छानो उडाएको छ । पदम बहादुर सिंदाली मगरको गोठको छानो उडाएको छ । नानीबाबु आलेको घरको जस्ताको छानो उडाएको छ भने सिर्जना राना मगरको घरको जस्ता उडाएको छ ।
कमलामाई नगरपालिका वडा नं. १३ मा हावाहुरीले ६ घर र तीन वटा गोठमा क्षति पुराएको छ । उक्त वडामा रमा राउतको घर र गोठको छानो उडाउँदा चार लाख बराबरको क्षति भएको छ । सोहि वडाका कृष्ण सुवेदीको घरको छानो उडाउँदा पचास हजार बराबरको क्षति भएको प्रहरीले जनाएको छ ।
प्रेम बहादुर मुक्तानको घरको छाने उडाउँदा चारलाख बराबरको क्ष्ति भएको छ । सम्झना भुलनको घरको छानो उडाउँदा २ लाख बराबरको क्षति भएको छ ।
त्यस्तै गिरीजा बहादुर ठकुरीको घरको छानो उडाउँदा तीनलाख बराबरको क्षति भएको छ भने दिपेन्द्र ठकुरीको दाजु भाई तथा पशुपन्छी फर्मको जस्ताको छानो उडाउँदा ४ लाख बराबरको क्षति भएको छ । खुस बहादुर थापाको घरको छानो उडाएको छ भने चन्द्र कुमारी ठकुरीको भान्साको छानो उडाएको छ ।
निर बहादुर मगरको घरको छानो उडाउँदा २ लाख बराबरको क्षति भएको छ । मिन बहादुर वि.कको पनि घरको छानो हावाहुरीले उडाएको छ । नैन बहादुर बुढाथोकीको गोठको छानो उडाएको छ ।
कमलामाई नगरपालिका वडा नं. ९ मा एक गोठमा क्षति पुगेको छ । गिता बरालको काठ र जस्ताको छानो भएको गोठको छानो उडाउँदा एक लाख बराबरको क्षति पुगेको प्रहरीको तथ्यांक रहेको छ ।
हावाहुरीका विद्युतको पोल र तारमा क्षति पुगेपछि घ्याङ्लेख, सुनकोसी, गोलन्जोर, फिक्कल, तीनपाटन र मरिण गाउँपालिका लगायतका अधिकांश क्षेत्रमा बिजुलीको प्रशारण लाईन अवरुद्ध भएको छ । कृषि बाली र फलफूलमा समेत क्षति पुगेको बताईएको छ तथापी कति क्षति भयो एकीन तथ्यांक भने आईसकेको छैन ।
