सिन्धुली । ३३ औं सहिद सम्झना स्मृति दिवसको अवसरमा एभिन्युज टेलिभिजनका सम्वाददाता शंकर सौगात सम्मानित भएका छन् । सहिद सम्झना स्मृति प्रतिष्ठान सिन्धुलीले सम्झनाको स्मृतिमा स्थापना गरेको सहिद सम्झना स्मृति पत्रकारिता पुरस्कार २०८२ बाट उनलाई सम्मान गरिएको हो ।
नेपाल पत्रकार महासंघ सिन्धुलीका पूर्व अध्यक्ष समेत रहेका सौगात नगद पाँच हजार, प्रमाणपत्र सहित सम्मानित भएका हुन् । शुक्रबार सहिद सम्झनाको ३३ औं स्मृति दिवसको अवसरमा सौगातसँगै शिक्षक तथा भाषा, संस्कृतिका संरक्षक विश्वनाथ बराल र दलित जेहेन्दर छात्रा लक्ष्मी कुमारी अछामी र जेहेन्दार छात्रा अपिला न्यौपाने सम्मानित भएका छन् । पुरस्कृत सबैलाई नगद पाँच हजार, सम्मानपत्र सहित सम्मान गरिएको हो ।
सहिद पिता तथा प्रतिष्ठानका अध्यक्ष शेषराज दाहालको अध्यक्षता तथा शिक्षाविद भिमविक्रम थापाको प्रमुख आतिथ्यतामा भएको सम्मान तथा पुरस्कार वितरण कार्यक्रममा उनीहरुलाई सम्मान गरिएको हो । कार्यक्रममा सहिद सम्झनाको फोटोमा माल्यार्पण समेत गरिएको छ ।
कार्यक्रममा बोल्दै प्रमुख अतिथि थापाले टनकपुर सन्धि विरुद्ध भएको सम्झनाको हत्याको दिनको स्मरण गर्दै उनको सम्मानमा कमी नराख्ने बताए । उनले आफु सहिदको बाटोमा लाग्दै सधै सत्कर्ममा लाग्ने प्रतिवद्धता व्यक्त गरे ।
कार्यक्रममा बोल्दै नेपाल पत्रकार महासंघ बागमती प्रदेशका उपाध्यक्ष बिमला पाण्डेले राजनीतिक, सामाजिक तथा व्यक्तिगत जीवनमा पुस्तान्तरण गर्न पुरानाको अनुभव र नयाँको जोशलाई साथमै लानुपर्नेमा जोड दिईन । पछिल्लो समय देशप्रति माया गर्ने भन्दा पनि तत्कालै नतिजा चाहिने प्रवृति बढेकाले दुर्घटना हुन सक्ने बताईन । सहिद सम्झना जस्ता स्कुलका विद्यार्थीहरुले देशको लागि रगत बगाउने दिन आउने वातावरण नबन्नु पर्नेमा जोड दिईन् ।
कार्यक्रममा सहिद पिता शेषराज दाहालले सरकारले सम्झनालाई जति नै कराउँदा पनि सहिद घोषणा नगरेको बताउँदै अब भन्नै मन लाग्न छोडेको बताए । उनले जुन सरकार आएपनि सहिद घोषणा नगरिदिएको गुनासो गरे । कार्यक्रममा बुढ्यौली साहित्य समाजका अध्यक्ष शम्भुप्रसाद गजुरेल, नेपाल पत्रकार महासंघ सिन्धुलीका पूर्व अध्यक्ष शंकर सौगात र गौमती माविका प्रधानाध्यापक दिपक बुढाथोकी लगाएतले मन्तव्य व्यक्त गरेका थिए । कार्यक्रममा प्रतिष्ठानका उपाध्यक्ष द्वारिका काफ्लेले स्वागत गरेका थिए भने सचिव टंकध्वज थापाले कार्यक्रम सञ्चालन गरेका थिए ।
