सिन्धुली । नेपाली कम्युनिष्ट पार्टीका संयोजक पुष्पकमल दाहाल प्रचण्डले राष्ट्रियसभाको चुनावमा एमालेले कांग्रेससँग गठबन्धन गरेर आफुहरुलाई हराएपछि एमालेसँग गठबन्धनको कुरा नमिलेको बताएका छन् । राष्ट्रिय सभाको निर्वाचन पूर्व सहकार्यको लागि छलफल भएको भए पनि राष्ट्रियसभामा सहकार्य नभएपछि प्रतिनिधिसभाको निर्वाचनमा सहकार्य नहुने बताएका छन् ।
शनिबार नेपाली कम्युनिष्ट पार्टी सिन्धुलीले आयोजना गरेको कार्यकर्ता प्रशिक्षणमा पार्टीका सहसंयोजक माधवकुमार नेपाल सहित सिन्धुली आएका प्रचण्डले पत्रकारहरुसँग कुरा गर्दै एमाले र अन्य कुनै पनि दलसँग घोषित अघोषित कुनै खालको गठबन्धन नहुने बताएका हुन् ।
टिकटको विषयलाई लिएर नेकपाका केन्द्रीय नेता हरिबोल गजुरेल र बागी उमेदवार बनेका महेश्वर दाहाललाई कारवाहि गरेका प्रचण्ड, माधवले कार्यकर्ता फकाउन सिन्धुली आएका हुन् । पार्टीमा टिकट विवादका विषयमा प्रचण्डले हरिबोल गजुरेललाई पटक पटक टिकट लिन आग्रह गरेको तर हरिबोलले टिकट नलिएपछि लेखनाथ दाहाल (राजन) लाई टिकट दिईएको बताए ।
उनले राष्ट्रियसभामै प्रयास विफल भएपछि प्रतिनिधिसभाको हकमा अघि बढ्न नसकेको बताए । उनले थपे, ‘हामीले त्यसको सुरुआत राष्ट्रिय सभाका सदस्यको निर्वाचनबाट हुन्छ भनेका थियौँ । तर राष्ट्रिय सभाको चुनावमा नेपाली कांग्रेस र एमाले मिलेपछि समीकरण हुन सकेन ।’
प्रचण्डले आफू चुनाव जित्नकै लागि रुकुम पूर्व नगएको दावी गरे । सिन्धुली, महोत्तरी, नुवाकोटबाट लडेको भए पनि आफुले सहजै चुनाव जित्ने आधार रहेको दावी गरे । उनले पार्टीबाट भावी प्रधानमन्त्रीबारे कुनै छलफल नगरेको भन्दै चर्चामा रहेकाहरूबाट कोहि पनि प्रधानमन्त्री नबन्ने बताए ।
