सिन्धुली । जिल्लामा झण्डै ३ हजार किशोरीलाई पाठेघरको क्यान्सर विरुद्धको एचपिभि खोप लगाइने भएको छ । जनस्वास्थ्य कार्यालय सिन्धुलीका अनुसार माघ २५ गतेदेखि फागुन १५ गतेसम्म जिल्लामा दुई हजार आठ सय सैँतीस जना किशोरीलाई पाठेघरको क्यान्सर विरुद्धको खोप एचपिभि खोप लगाइने भएको हो ।
अभियान विद्यालय स्तरमा माघ २५ गतेदेखि माघ २९ गतेसम्म र बिद्यालय बाहिर रहेका किशोरीलाई फागुन २ गतेदेखि फागुन १५ गतेसम्म जिल्लाका स्वास्थ्य संस्थाहरूमा खोप अभियान सञ्चालन गरिने जनस्वास्थ्य कार्यालय सिन्धुलीका खोप निरीक्षक पुष्पराज पन्तले जानकारी दिए ।
सिन्धुलीमाढीमा बुधबार भएको राष्ट्रिय खोप कार्यक्रम अन्तर्गत जिल्ला खोप समन्वय समितिको बैठक तथा सञ्चारकर्मीहरूसँग अन्तरक्रिया कार्यक्रममा पन्तले उक्त कुरा जानकारी गराएका हुन् । जनस्वास्थ्य कार्यालय सिन्धुलीको आयोजनामा भएको कार्यक्रममा जिल्ला समन्वय समितिका प्रमुख कारसाङ लामाको अध्यक्षतामा उक्त कार्यक्रम गरिएको थियो ।
कार्यक्रममा जिल्लामा सञ्चालन भइरहेका नियमित तथा विशेष खोप कार्यक्रमको अवस्था, उपलब्धि र चुनौतीबारे समिक्षा गरिएको थियो । कार्यक्रममा खोपको पहुँच नपुगेका समुदायसम्म सेवा विस्तार गर्ने विषयमा पनि छलफल गरिएको छ ।
कार्यक्रममा बोल्दै जिल्ला समन्वय समितिका प्रमुख कारसाङ लामाले खोप कार्यक्रम सफल बनाउन सबैलाई आग्रह गरेका छन् । जिल्लाका सबै स्थानीय तहमा खोपको पहुँच नपुगेको भन्दै सबै एक जुट भएर सबै किशोरीलाई खोपको पहुँचसम्म पु¥याउन आवश्यक रहेको बताए ।
