सिन्धुली । राष्ट्रिय भिटामिन ‘ए’ कार्यक्रम अन्तर्गत जिल्लामा करीब १९ हजार बालबालिकालाई भिटामिन ए र जुकाको औषधि खुवाईँदै छ । विहिबार र शुक्रबार सञ्चालन हुने उक्त अभियानमा जिल्ला भरी ४ सय ९८ जना महिला स्वास्थ्य स्वयम्सेविकालाई यो अभियानमा खटाईएको छ । उनीहरुले विहिबार विहानैबाट भिटामिन ए र जुकाको औषधि खुवाउन सुरु गरेका छन् ।
जिल्लामा ६ महिनादेखि ५९ महिनासम्मका १८ हजार ८ सय ५८ जना बालबालिकालाई भिटामिन ए खुवाईँदै छ भने एक वर्षदेखि ५ वर्षसम्मका १८ हजार ५ सय ८५ जना बालबालिकालाई जुकाको औषधि खुवाईने जनस्वास्थ्य कार्यालय सिन्धुलीले जानकारी दिएको छ ।
९ वटा स्थानीय तह मार्फत बालबालिकालाई भिटामिन ए र जुकाको औषधि खुवाउने काम सुरु भएको जनस्वास्थ्य कार्यालय सिन्धुलीका प्रमुख विमल पटेलले जानकारी दिएका छन् ।
उनका अनुसार विहिबार पायक पर्ने स्थान र २ सय ३७ खोप क्लिनिकबाट बालबालिकाहरुलाई भिटामिन ए र जुकाको औषधि खुवाईने छ भने शुक्रबार छुटेका बालबालिकालाई घर घरमा पुगेर स्वास्थ्य स्वयम्सेविकाले भिटामिन ए र जुकाको औषधि खुवाउने छन् ।
जिल्लामा सबैभन्दा बढी दुधौली नगरपालिकामा ५ हजार २२ जना बालबालिकालाई भिटामिन ए र ४ हजार ८ सय ८१ जना बालबालिकालाई जुकाको औषधि खुवाउने लक्ष्य लिइएको छ ।
त्यस्तै कमलामाई नगरपालिकामा ४ हजार २ सय ४१ जनाले खोप भिटामिन ए र ४ हजार २ सय १३ जनालाई जुकाको औषधी खुवाइने छ । तीनपाटन गााउँपालिकामा २ हजार ११ जनाले भिटामिन ए र १ हजार ९ सय ९८ जना बालबालिकालाई जुकाको औषधी खुवाईने छ ।
त्यस्तै फिक्कल गाउँपालिकामा ९ सय ७८ जना बालबालिकाले भिटामिन ए र ९ सय ४७ जना बालबालिकाले जुकाको औषधी खान्छन । गोलन्जोर गाउँपालिकामा १ हजार १ सय २५ जनाले भिटामिन ए र १ हजार ९३ जनाले जुकाको औषधि खानेछन् ।
त्यस्तै घ्याङ्लेख गााउँपालिकामा ७ सय ६ जनाले भिटामिन ए र ७ सय १३ जनाले जुकाको औषधि खानेछन् । सुनकोशी गााउँपालिकामा ८ सय ६३ जनाले भिटामिन ए र ८ सय ५६ जनाले जुकाको औषधी, हरिहरपुगढी गााउँपालिकामा १ हजार ९ सय ३० जनाले भिटामिन ए र १ हजार ९ सय ७ जनाले जुकाको औषधी खानेछन ।
त्यस्तै मरिण गााउँपालिकामा १ हजार ९ सय ८२ जनाले भिटामिन ए र १ हजार ९ सय ७७ जनालाई जुकाको औषधी खुवाउने लक्ष्य रहेको पटेलले बताए ।
कार्तिक २ र ३ गते सञ्चालन हुने अभियान यो वर्ष तिहार परेकाले २० र २१ गते सञ्चालन भएको हो । सरकारले बैशाख ६ र ७ गते पनि अभियान सञ्चालन गर्दै आएको छ ।
यो अभियानमा देशभरबाट पाँच वर्ष मुनिका करिब ७ लाख बालबालिकालाई भिटामिन ‘ए’ र २४ लाख बालबालिकालाई जुकाको औषधि खुवाइने लक्ष्य लिईएको छ ।
यस्तै ६ महिनाभन्दा माथिका बालबालिकालाई ‘बाल भिटा’ पोषणयुक्त आहार पनि दिइँदैछ । नियमित खोप लगाउन छुटेका ५ वर्षमुनिका बालबालिका पनि यो अवसरमा खोप दिइनेछ ।
बालबालिकामा हुनसक्ने स्वास्थ्य जटिलता तथा कुपोषणको जोखिम न्यूनीकरण गर्नका लागि सरकारले २०५० सालदेखि राष्ट्रिय भिटामिन ‘ए’ कार्यक्रम सञ्चालन गर्दै आएको छ । जुकाको औषधि भने २०५६ सालबाट खुवाउन थालिएको हो । यो अभियानमा देशभरबाट ५२ हजार स्वास्थ्य स्वयमसेविका परिचालन गरिएको छ ।
पछिल्लो अध्ययन अनुसार नेपालमा पाँच वर्षभन्दा मुनिका ११ प्रतिशत बालबालिकालाई भिटामिन ‘ए’ को कमी भएको देखिएको छ ।
