सिन्धुली । कमलामाई नगरपालिका वडा नं. १ सिम्लेमा जमिन भासिएर सर्दै गएपछि यहाँका १५ घर हायुहरु रहेको बस्ती नै जोखिममा परेको छ । जमिन भासिएर, चिरा चिरा परेर बस्ती नै सर्न थालेपछि यहाँका हायु परिवारले समयमा स्थानान्तरण हुन नसक्दा जोखिम क्षेत्रमा नै बसोबास गरिरहेका छन । जमिन चिरा चिरा पर्ने, बस्ती नै बग्दै गएको, घरहरु लच्किएको र बस्ती नै सर्न थालेका कारण बस्ती नै जोखिममा परेको छ ।
हायु वस्ती नै जोखिममा परेको सूचना पाएसँगै शुक्रबार प्रमुख जिल्ला अधिकारी दिनेश सागर भुसालको नेतृत्वमा सुरक्षा प्रमुखहरु, कमलामाई नगरपालिका सिन्धुलीका सागरकुमार ढकाल, पत्रकारहरु सहितको टोलीले जोखिमपूर्ण क्षेत्रको अनुगमन गरेको छ ।
उक्त क्षेत्र गत वर्षदेखि नै भासिन थालेको र असोज १७ गतेदेखि २१ गतेसम्मको वर्षातका कारण झनै जोखिममा परेको सागरकुमार ढकालले बताएका छन । उनका अनुसार १५ घर हायुहरु र उनीहरुको करिब २०, २२ विघा जति खेत समेत उत्तरपूर्वी साईडमा सर्दै गएको छ । जमिन सरेका कारण घरहरु बाँगो हुने, घेराबेरा खप्टेको, चिरा पर्ने भएको ढकालले बताएका छन ।
जमिनको अवस्थाको अध्ययन गर्न भुगर्भविदले जमिनको जाँच गर्नुपर्ने भए पनि सो को उपलब्धता हुन सकेको छैन । जिल्ला विपद व्यवस्थापन समितिले गत वर्ष नै जोखिम अध्ययनका लागि अनुरोध गरे पनि भुगर्भ परिक्षण हुन नसकेको ढकालले बताए ।
लोपोन्मुख जाती हायुहरुको सामाजिक, सांस्कृतिक कारणले पनि उनीहरुको स्थानान्तरणमा समस्या रहेको छ । यस्तै उनीहरुलाई पुग्ने उचित जमिनको समेत व्यवस्थापन हुन नसक्दा र जोखिमको उचित प्रतिवेदन नहुँदा एक वर्षदेखि हायु बस्ती स्थानान्तरण गर्न नसकिएको ढकालले बताएका छन ।
कमलामाई नगरपालिकाले मात्र बस्ती स्थानान्तरण गर्न सम्भव नभएको र प्रदेश, संघिय सरकारले यतातर्फ ध्यान नदिएकाले बस्ती स्थानान्तरणमा समेत नभएको उनले बताए ।
स्थलगत अनुगमनपछि प्रमुख जिल्ला अधिकारी दिनेश सागर भुसालले राष्ट्रिय विपद् जोखिम न्युनिकरण तथा व्यवस्थापन प्राधिकरणलाई जोखिमपूर्ण बस्तीको बारेमा शुक्रबार नै मौखिक जानकारी गराईएको बताएका छन् ।
नक्सा, ड्रोन म्याप, गतवर्षको निर्णय सहित विस्तृत प्रतिवेदन तयार गरि लिखित प्रतिवेदन समेत पठाउने तयारी भईरहेको प्रजिअ भुसालले जानकारी दिएका छन् । सुरक्षित बासस्थानको अभावमा जोखिम क्षेत्रमै बसोबास गरिरहेका हायु परिवार भने डर, त्रास र चिन्तामा रहेका छन ।
